भांगरभूंय | प्रतिनिधी
इंडीयन प्रिमीयर लिगेंतली (आयपीएल) 31वी मॅच येजमान कोलकाता नायट रायडर्स आनी राजस्थान रॉयल्स ह्या पंगडां मदीं हांगाच्या इडन गार्डन्स मैदानाचेर जातली. दोनूय पंगडां मदीं अजून मेरेन 28 मॅची जाल्यात. हातूंतल्यो 14 मॅची कोलकातान जाल्यार 11 मॅची राजस्थान रॉयल्सान जिखल्यात. एके मॅचीचो निकाल लागूंक ना. कोलकाता घरच्या मैदानाचेर खेळटलो. ह्या मैदानाचेर कोलकातान 10तल्यो 6 मॅची जिखल्यात, जाल्यार 3 मॅचींनी हार घेतल्या. एक मॅच रद्द जाल्या.
सुनील नरेन अंदूंच्या हंगामांत कोलकाता वतीन परतून डावाची सुरवात करपाक लागला आनी सध्या तो उत्कृश्ट फॉर्मांत आसा. ताणें अंदूंच्या हंगामांत अजून मेरेन 184चे स्ट्रायक रेटीन 33चे सरासरीन एक अर्द शेंकड्या सयत 167 धांवड्यो केल्यात. ताका आडावपाचें अस्त्र राजस्थाना कडेन आसा. तें म्हणल्यार फास्ट बॉलर ट्रॅण्ड बोल्ट. बोल्टान दोन आयपीएलांत ताका दोन खेपे बाद केला. ह्या कालावधीत सुनील नरेनान फकत 6.5 चे सरासरीन आनी 162.5चे स्ट्रायक रेटीन धांवड्यो केल्यात.
सुनील नरेना खेरीत ताच्याच देशाचो बॅट्समन आंद्रे रसेल लेगीत उत्कृश्ट फॉर्मांत आसा. ताणें 58चे सरासरीन आनी 213चे स्ट्रायक रेटीन धांवड्यो केल्यात. ताका कसो आडावप हाची जाप राजस्थाना कडेन ना. रसेल हो बोल्टा आड 195चे स्ट्रायक रेटीन धांवड्यो करता. जाल्यार बोल्टान आठ डावांनी फकत दोन खेपे ताका बाद करपाक येसस्वी थारला. तशेंच रसेलान राजस्थान रॉयल्साचो मुखेल स्पिनर युजवेंद्र चहला आड 198चे स्ट्रायक रेटीन धांवड्यो केल्यात. चहलान ताका सात डावांनी फकत एकदाच बाद केला. आर आश्विना आड ताणें 100चे स्ट्रायक रेटीन धांवड्यो केल्यात. जाल्यार आवेश खानान ताका चार डावांनी दोन खेपे बाद केला. ताका लागन रसेलाक बोल्ट-चहला बदला आश्विन आनी आवेश खान हांच्या आड सादूर रावपाची गरज आसा.
हे मॅचींत कॅरिबियन जोडी फकत बॅटिंगेंत न्हय जाल्यार बॉलिंगेंत लेगीत बरें प्रदर्शन करपाक शकता. राजस्थान रॉयल्साचो मुखेल बॅट्समन जॉस बटलर हो दोगांय आड खेळटना आडखळटा. दोगांयनी ताका तीन-तीन खेपे बाद केला. जाल्यार बटलरान तांच्या आड 134चे स्ट्रायक रेटीन धांवड्यो करपाक येसस्वी थारला. वरुण चक्रवर्तीन लेगीत बटलराक दोनदा बाद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
