भांगरभूंय | प्रतिनिधी
दोन खेपेचो वस्ताद कोलकाता नायट रायडर्सान दिल्ली कॅपिटल्साक 106 धांवड्यांनी हारयलो. कोलकातान दिल्ले 273 धांवड्यांचे मोखीचो फाटलाव करपी दिल्ली कॅपिटल्साक 17.2 ओव्हरींनी सगल्यो विकेटी वगडावन 166 धांवड्यो करप शक्य जाल्यो.
कोलकातान सेगीत तिसऱ्या जैता सयत गुणतकट्यांतली पयली सुवात मेळयली. मोखीचो फाटलाव करपी दिल्ली एकदाय जैत मेळयतलो अशें दिसूंक ना. फकत मुखेली ऋषभ पंत (55) आनी त्रिस्टन स्टब्स (54) हाणें संघर्श केलो. तांकां हेर बॅट्समनां कडल्यान साथ मेळूंक ना.
कोलकाता वतीन वरुण चक्रवर्ती आनी वैभव अरोरा हाणें दरेकी तीन विकेटी घेतल्यो. मिचेल स्टार्कान दोन जाल्यार आंद्रे रसेल आनी सुनील नरेन हाणें दरेकी एक विकेट घेतली.
ते आदीं टॉस जिखून पयलीं बॅटींग करपाचो निर्णय घेवपी कोलकाता नायट रायडर्सान आयपीएलाच्या इतिहासांतली दुसरी सर्वोच्च धांवसंख्या उबारली. ताणें निर्धारीत 20 ओव्हरींनी 7 विकेटी व्हगडावन 272 धांवड्यो केल्यो. सुनील नरेना कडल्यान परतून डावाची सुरवात करून घेवपाचो निर्णय येसस्वी थारलो.
नरेन आनी फिलिप सॉल्ट हाणें पयले विकेटी खातीर 27 बॉलांनी 60 धांवड्यांची ताबडतोड भागिदारी करून पंगडाक बरी बुन्याद घालून दिली. नरेनान इशांत शर्माचे एके ओव्हरींत 26 धांवड्यो केल्यो. अखेरेक ही जोडी एनरिच नॉर्खियान फोडली. ताणें पांचवे ओव्हरींत सॉल्टाक (18) बाद केलो. पूण, नरेनाची आक्रमक खेळी थांबूंक ना. ताणें 21 बॉलांनी अर्द शेंकडो पुर्ण केलो. पावर प्लेंत कोलकातान 1 विकेट व्हगडावन 88 धांवड्यो केल्यो.
हे सुरवातीक तिसरे सुवातेर बॅटिंगेक आयिल्ल्या अंगकृष रघुवंशीन जलद अर्द शेंकडो पुर्ण करून कायम राखली. 18 वर्सां पिरायेच्या अंगकृषान मनगटाचो योग्य रितीन वापर करून घेतलो. नरेनाक आडावपाक 13वे ओव्हरींत मिचेल मार्शाक येस आयलें. ताणें 39 बॉलांनी सात चवके आनी सात सक्यांचे मजतीन 85 धांवड्यो केल्यो. बाद जावचे पयलीं ताणें अंगकृषा वांगडा मेळून 48 बॉलांनी 104 धांवड्यो केल्यो.
अंगकृषान 27 बॉलांनी पांच चवके आनी तीन सक्यांचे मजतीन 54 धांवड्यांची खेळी केली. रसेलान सक्यांची परंपरा कायम राखतना 16 ओव्हरींनी पंगडाचो स्कोर 205 मेरेन पावयलो. अखेरच्या चार ओव्हरींनी धांवड्यांचो पावस घालून सनरायझर्स हैदराबादाचो 277 धांवड्याचो विक्रम मोडपाची ताका संद आशिल्ली. पूण, ताका जमूंक ना.
रसेल आनी श्रेयस अय्यर हांणी 26 बॉलांनी अर्द शेंकड्याची भागिदारी केली. अय्यरान 11 बॉलांनी 18 धांवड्यो केल्यो. 239 धांवड्यो जायना फुडें कोलकातान आयपीएलांतली आपली सर्वोच्च धांवसंख्या नोंदयली. रिंकू सिंगान 19वे ओव्हरींत तीन सके मारले. रिंकून 8 बॉलांनी एक चवको आनी तीन सक्यांचे मजतीन 26 धांवड्यो केल्यो. 20वे ओव्हरींत इशांत शर्मा बॉलिंगेक आयलो. ताणें पयलोच बॉल उत्कृश्ट रितीन यॉर्कर घालो आनी 19 बॉलांनी चार चवके आनी तीन सक्यांचे मजतीन 41 धांवड्यो करपी रसेलाक बोल्ड केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
