भांगरभूंय | प्रतिनिधी
चेन्नय सुपरकिंग्सान सेगीत दोन हारी उपरांत अखेरे इंडीयन प्रिमीयर लिगेच्या (आयपीएल) अंदूंच्या हंगामांतलें तिसरें जैत नोंदयलें. तशेंच ताणें कोलकाता नायट रायडर्साची जैताची धांव आडायली. चेन्नय सुपरकिंग्सान 7 विकेटींनी जैत जोडलें.
कोलकाता नायट रायडर्सान दिल्ली 138 धांवड्यांची मोख चेन्नय सुपरकिंग्सान 17.4 ओव्हरींनी 3 विकेटी वगडावन 141 धांवड्यो करून मेळयली. हांगाच्या चेपॉक मैदानाचेर चेन्नयच्या बॉलरांनी आपलो शेक दवरलो आनी ताका लागून आक्रमक बॅट्समनांची फळी आशिल्ल्या कोलकाता नायट रायडर्साक बांदून दवरलो. जैताचो चवको मारून गुणतकट्यांत पयले सुवातेर उडी मारपाच्या यत्नांत आशिल्ल्या कोलकाता नायट रायडर्साक अंदूंच्या हंगामांत पयले हारीक तोंड दिवचें पडलें.
चेन्नय सुपरकिंग्साच्या बॉलरांनी जबरदस्त प्रदर्शन केलें. रवींद्र जडेजा आनी तुषार देशपांडे हाणें दरेकी 3 विकेटी घेतना कोलकाताच्या आक्रमक बॅट्समनांक शांत दवरले. तुषारान पयल्याच बॉलाचेर फिल सॉल्टाक बाद केलो. ते उपरांत जडेजान आठ बॉलांनी 3 विकेटी घेवन मॅच चेन्नय वटेन घुंवडायली. कोलकाता वतीन अंगकृष रघुवंशी (24), सुनील नरेन (27) आनी मुखेली श्रेयस अय्यर (34) हांणी बरी बॅटींग केली. पूण, तांकां व्हड खेळी करपा पसून चेन्नयच्या बॉलरांनी आडायले.
जडेजान फकत 18 धांवड्यो दिवन 3 विकेटी घेतल्यो. जाल्यार तुषारान 33 धांवड्यांनी 3 विकेटी घेतल्यो. मुस्ताफीजुर रहमानान दोन विकेटी मेळयल्यो.
मोखीचो फाटलाव करपी चेन्नय सुपरकिंग्साक रचीन रविंद्र आनी ऋतुराज गायकवाड हाणें बरी सुरवात करून दितना पयले विकेटी खातीर 27 धांवड्यांची भागिदारी केली. वैभव अरोरान कोलकाताक पयलें येस मेळोवन दिलें. ताणें रचीनाक (15) तंबूंत धाडलो. पूण, मुखेली गायकवाड आनी डॅरील मिचेल हांणी खेळपट्टीचेर जम बसयलो. दोगांयनी अर्द शेंकड्याची भागिदारी करून चेन्नयक जैताच्या दारार हाडलो.
ऋतुराज गायकवाडान 45 बॉलांनी अर्द शेंकडो पुर्ण केलो. मुखेली म्हणून ताचो हो पयलो अर्द शेंकडो थारलो. तशेंच फाटल्या पांच वर्सांनी चेन्नय सुपरकिंग्सा वतीन मुखेल्यान नोंदयिल्लो हो पयलोच अर्द शेंकडो लेगीत थारलो. ऋतुराज गायकवाड आनी डॅरील मिचेल हांणी 55 बॉलांनी 70 धांवड्यांची भागिदारी केली. सुनील नरेनान ही जोडी फोडटना मिचेलाक (25) बोल्ड केलो.
इम्पॅक्ट प्लेयर म्हणून आयिल्ल्या शिवम दुबेन ताबडतोड बॅटींग केली. ऋतुराज गायकवाडान 58 बॉलांनी 9 चवक्यांचे मजतीन नाबाद 67 धांवड्यो केल्यो. शिवमान 18 बॉलांनी एक चवको आनी तीन सक्यांचे मजतीन 28 धांवड्यो करून बोल्ड जालो.
जैता खातीर तीन धांवड्यांची गरज आसतना महेंद्रसिंग धोनी आयलो. त्या वेळार प्रेक्षकांनी जल्लोश केलो. ह्या जैतान चेन्नय 6 गुणां सयत चवथे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
