भांगरभूंय | प्रतिनिधी
इंडीयन प्रिमीयर लिगेचे (आयपीएल) काल जाल्ले दुसरे मॅचींत येजमान कोलकाता नायट रायडर्सान सनरायझर्स हैदराबादा आड 4 धांवड्यांनी निसट्टें जैत जोडलें.
कोलकातान दिल्ले 209 धांवड्यांचे मोखीचो फाटलाव करतना सनरायझर्स हैदराबादाक निर्धारीत 20 ओव्हरींनी 7 विकेटी वगडावन 204 धांवड्यो करप शक्य जाल्यो. एका वेळार कोलकाता सहज जिखतलो अशें दिशिल्लें. पूण, सनरायझर्साचो मदले फळयेंतलो बॅट्समन हॅन्रीच क्लासेनान 29 बॉलांनी 63 धांवड्यांची खेळी करून मॅचींत उमळशीक हाडली. पूण, अखेरेक तो बादल्ल्यान सनरायझर्साची जैताची आस्त सोंपली.
ते आदीं टॉस हारल्या उपरांत पयलीं बॅटींग करपी कोलकाता नायट रायडर्सान निर्धारीत 20 ओव्हरींनी 7 विकेटी वगडावन 208 धांवड्यो केल्यो. आंद्रे रसेलान 25 बॉलांनी नाबाद 64 धांवड्यांची आक्रमक बॅटींग केली. ताणें फकत 20 बॉलांनी आपलो अर्द शेंकडो पुर्ण केलो. ताचे वादळी खेळी मुखार सनरायझर्स हैदराबादाच्या एकाय बॉलराक तग धरपाक जमलो ना. जाल्यार फिल सॉल्टान 40 बॉलांनी तीन चवके आनी तीन सक्यांचे मजतीन 54 धांवड्यो केल्यो. रमनदीप सिंगान 35 आनी रिंकू सिंगान 23 धांवड्यांचें योगदान दिलें.
भुवनेश्वर कुमारान सगल्यांत चड धांवड्यो दिल्यो. तशेंच एकूय विकेट मेळूंक ना. ताणें चार ओव्हरींनी 51 धांवड्यो दिल्यो. जाल्यार मार्को जॉन्सेनान 40, पॅट कमिन्सान 32, मयंक मार्कंडेयान 39 आनी नटराजनान 32 धांवड्यो दिल्यो.
टी नटराजनान तीन विकेटी घेतल्यो. मयंक मार्कंडेन दोन जाल्यार पॅट कमिन्सान एक विकेट मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
