कोलकातांतले घडणुकेचो निशेधः पणजेंत दोतोर, नर्सींचो मूक मोर्चा

भांगरभूंय | प्रतिनिधी

गोंय वैजकी कायद्यांत दुरुस्ती करपाची मागणी

पणजी ः राज्यांतले दोतोर, नर्सींक सुरक्षा दिवपा खातीर गोंय वैजकी कायद्यांत दुरुस्ती, जिल्लो कृती दळ स्थापन करपा वांगडाच हॉस्पिटलांक सुरक्षीत सुवात म्हूण जाहीर करपाची मागणी शेनवारा ‘आयएमए’च्या गोंय फांट्यान पणजे आयोजीत केल्ल्या मूक मोर्चा वेळार केली. कोलकातांतले बायल दोतोराचेर अत्याचार करुन तिका जिवेशीं मारप्यांक बेगोबेग अटक करून तांचे आड खर कारवाय करची अशी मागणी तांणी केली.

कोलकातांतले घडणुकेचो निशेध करपा खातीर शेनवारा जाल्ल्या देशभरांतल्या संपांत वांटो घेवपी राज्यांतल्या खाजगी दोतोरांनी ओपीडी बंद दवरून पणजेंत मूक मोर्चा काडलो. आमदार डॉ. चंद्रकांत शेट्ये, ‘आयएमए’ च्या गोंय फांट्याचे मुखेली डॉ. संदेश चोडणकार, डॉ. शेखर साळकार हांचे वांगडा राज्यभरांतले शेंकड्यांनी दोतोर आनी नर्सी ह्या मोर्चा खातीर हाजीर आशिल्ले.
बायल दोतोराचेर अत्याचार करुन केल्लो खून ही धक्को दिवपी घडणूक आसा. हे घडणुकेक लागून देशांतले दोतोर सुरक्षीत नात अशें दिसून येता. देखून केंद्र सरकारान दोतोर आनी नर्सींचे सुरक्षे खातीर गरजेची पावलां उबारपाची गरज आसा. कोलकातांतल्या प्रकरणांतल्या आरोपींक अटक करुन खर कारवाय करपाची गरज आसा अशें चोडणकार हांणी म्हणलें.
वैजकी कायदो गोंयांत अस्तित्वांत आसा. पूण ताची सारकी अंमलबजावणी जायना. राज्य सरकारान ह्या कायद्यांतल्या दुरुस्ती करपा वांगडाच दोतोर आनी नर्सींचे सुरक्षे खातीर गरजेचे उपाय करपाची मागणी करपी निवेदन आयज सरकाराक सादर करतले असोय उल्लेख तांणी केलो.
दोतोर आनी नर्सी हांचे सुरक्षेची जापसालदारकी राज्य सरकाराचेर आसा. देखून सरकारान दोतोरांच्यो सगळ्यो मागणी मान्य करपाक जाय. ते खातीर आपूण पुराय यत्न करतलों अशें आमदार डॉ. शेट्ये हांणी सांगलें.