भांगरभूंय | प्रतिनिधी
पेडणें: कोरगांव ग्रामपंचायतीच्या सरपंचपदार कल्पिता कलशांवकार हांची विरोधाविणें निवड केली. नव्या सरपंचाक आमदार प्रवीण आर्लेकार हांणी येवन परबीं भेटयलीं आनी ग्रामपंचायत क्षेत्राच्या पुरायेन उदरगती खातीर शासना वरवीं सगळे तरेचें सहकार्य करपाची गवाय दिली.
आदले सरपंच देविदास नागवेंकार हांणी पंदरा दिसां पयलीं परस्पर थारिल्ल्या अलिखीत करारा प्रमाण सरपंचपदाचो राजिनामो दिल्ल्यान हें पद रितें जाल्लें. उपरांत ३ तारखेर ग्रामपंचायत मंडळाची विशेश बसका घेवन सरपंचपदाची निवड जाली. सरपंचपदा खातीर कल्पिता कलशांवकार हिचो एकूच अर्ज आयिल्ल्यान तांची निवड विरोधाविणें जाली.
ह्या वेळार उपसरपंच दिवाकर जाधव, पंच समीर भाटलेकार, लौकीक शेट्ये, श्री. चारी, जिल्लो वांगडी राधिका पालयेंकार तशेंच हेर पंच वांगडी हाजीर आशिल्ले.
निवड जाले उपरांत आमदार प्रवीण आर्लेकार हांणी नव्या सरपंचांचो भोवमान करून परबीं भेटयलीं. तांणी म्हणलें, राज्य सरकाराच्या विवीध लोककल्याणकारी येवजण दरेका पात्र नागरिकां मेरेन पावोवपाची जापसालदारी ग्रामपंचायतीची आसा. सरपंच, उपसरपंच आनी पंच वांगड्यांनी आपल्या प्रभागांतल्या दरेका कुटुंबा मेरेन शासनाच्यो येवजण्यो पावोवन गांवाच्या सर्वांगीण उदरगती खातीर एकवटान काम करचें.
नवी सरपंच कल्पिता कलशांवकार हांणी पंच वांगड्यांनी दाखयिल्ल्या विस्वासाविशीं उपकार मानले. तिणें म्हणलें, म्हजेर दवरिल्लो विस्वास सार्थ करपाक प्रमाणीकपणान काम करतली. आमदार प्रवीण आर्लेकार हांच्या मार्गदर्शना खाला तशेंच सगल्या पंच वांगड्यांच्या सहकार्यान ग्रामपंचायतींतलीं प्रलंबीत उदरगतीचीं कामां आनी विवीध प्रकल्प शासनाच्या माध्यमांतल्यान पुराय करपाचे यत्न करतलों.
ह्या वेळार ग्रामस्थ, आदले-आतांचे सरपंच, उपसरपंच, पंच वांगडी तशेंच भारतीय जनता पक्षाचे पदाधिकारी आनी कार्यकर्ते व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
