भांगरभूंय | प्रतिनिधी
भांगरभूंय | प्रतिनिधी
कोरगांव : कोरगांव माईण वाड्या वयलो दक्ष राजेंद्र पोळजी हो 16 वर्सांचो भुरगो पुरायपणान दिव्यांग आसा, पूण तो खूब हुशार भुरगो. ताकां बरे तरेन चलपाक जमना, उबें रावपाक जमना. सगलीं कामां खाटीर रावनूच करचीं पडटात. ताचो मामा अशोक आनी तिची आवय रोशनी आनी घरकान्न ताची देखरेख करतात.
घरांत इंटरनॅट ना, नेटवर्क ना. पूण दक्षाची आवय 500 मिटर पयस भायर येता आनी लागसारचो हॉट स्पॉट घेवन दक्षाक शाळेच्या शिक्षकांनी धाडिल्लो अभ्यास डावनलोड करूंक दिता. दक्ष कोरगांव हांगच्या कमलेश्वर उच्च माध्यमीक विद्यालयांत इकरावींत शिकता. ताचो मामा ताका विद्यालयांत व्हर-हाड करता. दक्षाक धावेक 85 टक्के गूण मेळ्ळ्यात.
दक्षाचे कुटूंब गरीब, उत्पन्नाचे तशें साधन ना. सामकीच गंभीर गजाल म्हणल्यार दक्षाचो बापूय दुयेंत आसा आनी हालींच ताचो पांय कापचो पडला. ताची भलायकी सामकीच हाल्ल्या. तोवूय घरांत खाटीरूच आसता. सरकार कशी तरी मजत करची म्हूण ह्या कुटूंबाची मागणी आसा.
गोंय काँग्रेसीचे प्रदेश सरचिटणीस विजय भिके आनी उत्तर गोंय काँग्रेसीचे युवा अध्यक्ष रेनाल्डो, तशेंच प्रदीप हरमलकार, प्रमेश मयेंकार, अक्षय नायक हांणी तांची भेट घेवन धावेंत बरें गूण घेवपी दक्षाचो भोवमान केलो.
थळाव्या आमदारान दक्ष धावेंत आसतना ताकां मजत केल्ल्याची म्हायती मेळ्ळ्या. दक्षाक सरकाराचे मजतीची सामकी गरज आसा. ताका सीए जावपाचे आसा, ते खातीर आधार म्हण्टा तो जायच. मुख्यमंत्री प्रमोद सावंत हांणी हात दिवचो म्हूण दक्षाची आवय मागता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
