भांगरभूंय | प्रतिनिधी
कोरगांव : कोरगांवचे ग्रामसभेंत विवीध विशयांचेर चर्चा जाली. ह्या वेळार पेडणें ते कोरगांव मुखेल रस्त्याचें डांबरीकरण केल्ले खातीर ग्रामस्थांनी आमदार प्रवीण आर्लेकार हांकां परबीं भेटयलीं. तशेंच मेघा प्रकल्पांक कोरगांव पंचायत वाठारांत थारो दिवचो न्हय, असो थाराव ग्रामस्थांनी मांडलो. तशेंच कोयर समस्या, बिगर गोंयकारांनी केल्ले बेकायदेशीर बांदकाम अश्या विंगड विंगड विशयांचेर चर्चा करून थाराव संमत केलो.
सरपंच देविदास नागवेंकार हांचे अध्यक्षते खाला जाल्ले हे ग्रामसभेचे माचयेर पंचायत वांगडी समिल भाटलेकार, सरपंच देवीदास नागवेंकार,अब्दुल करिम यासीन नायक, दिवाकर जाधव, नीता नर्से, कल्पीता कलशांवकार, पंच अनुराधा कोरगांवकार, उमेश च्यारी, पंचायत सचीव अविनाश पाळणी आनी निरीक्षक म्हणून देवानंद गावडे हाजीर आशिल्ले.
पेडणें ते कोरगांव मुखेल रस्तो फाटलीं कितलींशींच वर्सां जालीं तसोच आशिल्ल्यान ते सुवातेर अपघात जाताले, तशेंच ह्या रस्त्यार व्हडलीं फोंडकुलांय पडिल्लीं. जायते फावटीं हो प्रस्न मांडून लेगीत तो सुटूंक नाशिल्लो. आमदार प्रवीण आर्लेकार हांणी ह्या रस्त्याचें डांबरीकरण करून दिल्ल्यान तांकां देवानंद गावडे, सुदीप कोरगांवकार, पंच दिवाकर जाधव, सरपंच आनी हेर थळाव्यांनी परबीं भेटयलीं.
पंचायत सभाघराचें नुतनीकरण करपाचें काम सध्या सुरू आसा. त्या इमारतीचें पोरणें सामान संबंदीत पंचांनी विकिल्ल्याचो आरोप करीत, तशे पुरावे आशिल्ल्याचें थळावे नरेश कोरगांवकार हांणी सांगलें. हाचेर सरपंचानी उलयतना सांगलें, असो प्रकार आसल्यार ताचेर कारवाय करतले आनी हो विशय मुखार व्हरतले.
दोंगरार बेकायदेशीर बांदकामां
कोरगांव ग्रामपंचायतवाठारांत खुबश्या सुवातांचेर रानांनी, दोंगरांचेर बेकायदेशीर बांदकामां जातात. रानां नश्ट जातात. जनावरां, सवणीं, सैमीक झर्यांचेर वायट परिणाम जाता. अशें आसूनय कोरगांवची जैव विविधता समिती ताचे कडेन लक्ष दिनाशिल्ल्यान सैमाचें बरेंच लुकसाण जाता. हें बेकायदेशीर बांदकाम पंचायतीन बेगोबेग उडोवचें असो थाराव फाटले ग्रामसभेंत दिल्लो. ताची फाटपुरवण कितें जाल्या?, असो प्रस्न थळावे राहुल भगत हांणी केलो तेन्ना सरपंचान हाचेर कारवाय करतले अशें सांगलें.
उदक ना
कोरगांवां कांय सुवातांचेर उदक नासता. हे विशींय ह्या वेळार चर्चा जाली. चर्चेक जाप दितना सरपंचान, आमदार प्रवीण आर्लेकार हांकां कळळलां. होय प्रस्न रोखडोच सोडयतले अशें सांगलें.
कोरगांव पंचायत वाठारांतल्यो खळयो, रस्त्या कुशीक वाडिल्लीं झाडां, हेर पावसा पयलींचीं कामां सरपंच आनी पंचायत वांगड्यांनी करून दिवचीं अशी मागणी ग्रामस्थांनी केली.
भालखाजन कोरगांवां लोकांक खारट उदक मेळटा. फाटले कितलेशेच ग्रामसभेंत चर्चा करून अजूनय हो विशय सुटूंक ना. हो प्रस्न सोडोवचो अशी मागणी विकास गावडे हांणी केली. तशेंच पंचायतीन हेर कामांचेरूय लक्ष दिवचें अशी चर्चा जाली.
कोरगांवच्या रस्त्यांचेर कोयर
कोरगांवां रस्त्याच्या कुशीक व्हडा प्रमाणांत कोयर उडयतात. पंचायतीन लायिल्ल्या सी सी टीव्ही कॅमेर्या वतीन पळोवणी करून भौशीक सुवातेर कोयर हाडून उडोवप्यांचेर कारवाय करची, अशी मागणी सुदीप कोरगांवकार आनी हेर ग्रामस्थांनी ह्या वेळार केली.
हे ग्रामसभेंत थळावे सुदीप कोरगांवकार, पंढरीनाथ आरोलकार, नरेश कोरगांवकार, रोहिदास भाठलेकार, विकास गावडे, देवानंद गावडे, प्रकाश तळावणेकार, महादेव गवंडी, राहुल भगत, अधीनी भाग घेतलो.
ग्रामसभेच्या निमाणे कडेन सरपंच देवीदास नागवेंकार हांणी सगल्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
