भांगरभूंय | प्रतिनिधी
कोयर वेवस्थापन म्हामंडळ बसकेंत दर्यादेग वाठारांतल्या स्थितींचो घेतलो नियाळ
पणजी, प्रतिनिधी : कोयराचें योग्य वेवस्थापन करपाक 70 टक्के पंचायतींक अपेस आयलां. कोट्यांनी रूपया खर्च करून लेगीत रस्त्याच्या कुशीक कोयर दिश्टी पडटा, अशें मुख्यमंत्री डॉ. प्रमोद सावंत हांणी सांगलें. कोयराचें शुल्क घेवन लेगीत ज्यो पंचायती कोयर वेवस्थापन सारकें करिनात, तांच्या कारभाराची सरकार देखरेख करतलो, अशें मुख्यमंत्र्यांनी बसके उपरांत सांगलें.
डॉ. सावंत हांणी मंगळारा सांखळे बसका घेवन दिवचल म्हालांतल्या कोयराच्या स्थितीचो नियाळ घेतलो. हाचे उपरांत बिरेस्तारा मंत्रालयात तांणी दर्यादेग वाठारांतल्या कोयराच्या स्थितीचो नियाळ घेतलो. बसकेंक कोयर वेवस्थापन म्हामंडळाचे अधिकारी हाजीर आशिल्ले.
कोयर वेवस्थापना खातीर दरेकी पंचायतीक निधी मेळटा. तशेंच पंचायती कोयरा खातीर शुल्क घेता. हांतूतल्यान दरेके पंचायती कडेन कोयर एकठांय करपाक शेड (एमआरएफ) आसप गरजेचें आसा. पंचायतींनी घरपट्टी सयत कोयराचे शुल्क घेवप सक्तीचें आसा. दरेकी पंचायतींन कोयर एकठांय करपा खातीर कंत्राटदाराची नेमणूक करपाक जाय. गोंय कोयर वेवस्थापन म्हामंडळा खाला कोयर एकठांय करपी कंत्राटदारांचे एम्पेनलमेंट जातलें. सुको कोयर आनी ओलो कोयर हो वेगळो करून ताचो विलो लावपाची प्रक्रिया सुरळीत जावपाक जाय. कोयर एकठांय करपा खातीर शेड तशेच कंत्राटदाराची नेमणूक करपाक देड म्हयन्याचो वेळ मेळटलो. पंचायतींक वित्त आयोगा कडल्यान निधी मेळटा. वित्त आयोगाचो निधी आनी स्वच्छता अभियानाच्या निधीचो वापर पंचायतींनी करपाक जाय. ह्या निधींतल्यान कोयराचे वेवस्थापन करप पंचायतींक शक्य जातलें, अशें डॉ. सावंत हांणी सांगलें.
पंचायतीच्या कोयरा सयत उद्देगीक कोयर, रासायनीक कोयर हाचो विलो लावपा खातीर आनीक एक बसका जातली, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
