कोयर प्रकल्पां खातीर कोमुनिदादीच्यो जमनी दितले

भांगरभूंय | प्रतिनिधी

बाबुश मोंसेरातः अधिकाऱ्यां कडेन चर्चा करूंक नाशिल्ल्यान पंच बेजार

भांगरभूंय । प्रतिनिधी

फोंडें: दरेका पंचायत वाठारांत कोयर प्रकल्प उबारपा खातीर कोमुनिदादची जमीन मेळोवन दितले. फुडारांत कोयर प्रकल्पाची खर गरज लागतली, अशें महसूल मंत्री बाबुश मोंसेरात हांणी सांगलें.

फोंड्यां शुक्रारा प्रशासन तुमच्या दारांत कार्यावळींत मंत्री मोंसेरात उलयताले. हे कार्यावळींत तांणी म्हालांतले विवीध सरपंच आनी पंचांच्यो समस्या आयकून घेतल्या. चडशा पंचायतींनी कोयर प्रकल्प उबारपा खातीर जमनीचो प्रस्न सुटावो करपी मागणी सरपंच आनी पंचांनी तांचे कडेन केली. ह्या वेळार अतिरिक्त जिल्होधिकारी विशाल कुंडयकार, उपजिल्होधिकारी अग्नेस क्लेटा, फोंडें पालिकेचे मुध्याधिकारी सोहन उस्कयकार, नगराध्यक्ष रितेश नायक, नगरसेवक विश्वनाथ दळवी, शांताराम कोलवेंकार आनी म्हालांतले सगळ्या खात्याचे वरिश्ठ अधिकारी हाजीर आशिल्ले.

सुमार 5 म्हयन्यां आदीं आपूण फोंडेंच्या सरकारी कार्यालयाक भेट दिल्ली. त्या वेळार कदंब बसस्टॅणअडाचेर आशिल्लें म्हायतीघर 8 दिसां भितर उपजिल्होधिकारी कार्यालयाच्या तळमाळ्यार सुरू करपाचें आस्वासन दिल्लें. पूण म्हायतीघर स्थलांतर करपा खातीर सुमार 45 लाख रुपया खर्च अपेक्षीत आसा. हे संबंदांत फाटपुरवण करून म्हायतीघराचें स्थलांतर करतले, अशें मंत्री मोंसेरात हांणी सांगलें.

मंत्री मोंसेरात हांणी अतिरिक्त जिल्होधिकारी विशाल कुंडयकार हांच्या कार्यालयांत विवीध पंचायत वांगड्यां कडेन चर्चा केली. ह्या वेळार म्हालांतले सगळ्या खात्याचे वरिश्ठ अधिकारी कार्यालया भायर बसून आशिल्ले. दनपारां मंत्री कार्यालयांतल्यान फोंडें पालिकेच्या कार्यालयांत गेले उपरांत सगळे अधिकारी आपापल्या कार्यालयांत दाखल जाले. विवीध पंचायतींतल्यान आयिल्ल्या पंच वांगड्यांनी आपल्यो समस्या मंत्र्या मुखार मांडल्यो खऱ्यो, पूण मंत्र्यान अधिकाऱ्यां कडेन चर्चा करूंक नाशिल्ल्यान पंच वांगड्यांनी नाराजी उक्तायली.

पुलीस लेगीत भियेतात, पूण अधिकारी मात ना….

मोहिनी नांवाचे एके बायलेन मंत्री बाबुश मोंसेरात हांची भेट घेवन फोंडें म्हालांतले विवीध खात्याचे अधिकारी वेळार मेळा नाशिल्याची कागाळ केली. आपल्याक पुलीस लेगीत भियेतात, पूण हेर खात्यांतले अधिकारी मातूय भियेनात, अशें सांगले उपरांत थंय आशिल्ल्यांक हांसपाक आयले बगर रावले नात.