कोयर उखलपी सगले कंत्राटदार हाचे मुखार घन कोयर वेवस्थापन म्हामंडळा खाला : मुख्यमंत्री

भांगरभूंय | प्रतिनिधी

पणजी ः हॉटेल, कारखान्यांचो कोयर एकठांय करपी कंत्राटदारांक घन कोयर वेवस्थापन म्हामंडळा खाला हाडून कोयर एकठांय करपाची जापसालदारकी राज्य सरकार स्वता घेतले अशें आश्वासन मुख्यमंत्री डॉ. प्रमोद सावंत हांणी शुक्रारा विधानसभा सभाघरांत उलयतना दिलें.
कुठ्ठाळेचें आमदार आंतोन वाझ हांणी प्रस्न- जाप सत्रा वेळार हे संबंदी प्रस्न मांडलो. 7 जुलय 2024 दिसा कुठ्ठाळी कोमुनिदादीच्या सुवातींत एक ट्रक कोयर हाडून उडयतालो. ट्रक ड्रायव्हराक धरून पुलिसांच्या ताब्यांत दिलो. पूण न्यायालयान ट्रका वांगडाच ताकाय सोडला. भौशीक सुवातेर तशेंच कोमुनिदादीच्या सुवातेर कोयर उडोवपी ट्रकांचे परवाने निलंबित करतले अशें आश्वासन मुख्यमंत्री सावंत हांणी कांय दिसां आदीं सभाघरांत दिल्लें. मागीर ह्या ट्रकाचो परवानो कित्याक निलंबित जायना असोय प्रस्न तांणी केला.
मजगतीं, वाझ हांच्या प्रस्नाक जाप दितना मुख्यमंत्र्यान सांगलें, कुठ्ठाळी कोमुनिदादीच्या सुवातेर जो खाजगी कंत्राटदार कोयर उडयतल्लो तो ताकाच उखलूंक लायतले. इतलेंच न्हय तर हॉटेल आनी कारखान्यांतल्यान कोयर एकठांय करपी खाजगी कंत्राटदारांक घन कोयर वेवस्थापन म्हामंडळा कडेन नोंदणी करपाक सक्तीचे करुन कोयर एकठांय करपाची जापसालदारकी राज्य सरकार घेतले असोय उल्लेख मुख्यमंत्र्यान केलो.

चार लाखांच्या बॉण्डाचेर सुटका!
कुठ्ठाळी कोमुनिदाद वाठारांत ट्रकांन कोयर उडोवपाची कागाळ आयले उपरांत ती नोंद केली. हे प्रकरण न्यायालयांत पावले उपरांत ताका 4 लाखांचो बॉण्ड घेवन जामीन दिलो. ते भायर ट्रकूय सोडलो, अशें कोयर वेवस्थापन मंत्री बाबूश मोन्सेरात हांणी सांगलें.