भांगरभूंय | प्रतिनिधी
मॉवीन गुदिन्हो: म्हापश्यां नितळ भारत नितळ गोंय समिट- 3 चो समारोप सुवाळो
म्हापशें: गोंयचो कोयरा प्रस्न सोडोवन राज्य नितळ आनी पाचवें दवरपा खातीर अधिकारी आनी नागरिकांनी एकठांय येवन यत्न करपाची गरज आसा. कोयराची समस्या सोडोवपा खातीर सरकारी अधिकाऱ्यांनी आनी लोकप्रतिनिधींनी कचेरेचे भायर सरून काम करचें अशें आवाहन पंचायत मंत्री मॉवीन गुदिन्हो हांणी केलें.
बिरेस्तारा म्हापश्यां सास्वत म्हाविद्यालयांत आयोजीत केल्ल्या नितळ भारत नितळ गोंय समिट- 3 च्या समारोप सुवाळ्यांत ते उलयताले. ह्या वेळार उपसभापती ज्योशुआ डिसोझा नगराध्यक्षा डॉ. नूतन बिचोलकार, पंचायत प्रशासनचे उपसंचालक कृष्णकांत पांगम हाजीर आशिल्ले.
कोयर वेवस्थापना विशीं मंत्री गुदिन्हो हांणी चिखले आनी बोगमाळो गांवचें उदाहरण दिलें. दोनूय गांवांनी कोयर प्रक्रिया प्रकल्प सुरू करून नितळ आनी हरीत पर्यावरणाचें काम केलां. जेन्ना हे दोनूय गांव करूंक शकतात जाल्यार हेर पंचायती कित्याक करूंक शकनात. आमचे कडेन कोयर एकठांय करप, विलो लावप तशेंच केंद्र सरकाराचें निधी सहाय्यक हे सारक्यो सुविधा आसून लेगीत आमचें राज्य कोयरमुक्त कित्याक जायना असो प्रस्नूय तांणी उपस्थीत केलो.
आतां सरकारी अधिकारी आनी लोकप्रतिनिधींनी कचेरेंत बसपाचे दीस सोंपल्यात. गटविकास अधिकारी, सरपंच आनी पंच वांगड्यांनी कोयराचे समस्येक तोंड दिवपा खातीर बरें नेतृत्व दिवन स्वताक बरे प्रशासक म्हूण दाखोवपाची ही वेळ आशिल्ल्याचें गुदिन्हो हांणी म्हणलें.
मंत्री गुदिन्हो हांणी कोयर वेवस्थापने विशीं म्हापशें नगरपालिकेकूय मजतीचो हात दाखयलो. कोयराचे समस्येक मुखार कशें वचप आनी गोंयचें नितळ शार करपा खातीर कल्पना आनी सहकार्य करपाची गवाय तांणी दिली.
ह्या वेळार उपसभापती ज्योशुआ डिसोझा हांणी मनोगत उक्तायलें. ह्या वेळार विवीध म्हालांतल्या स्वच्छता कर्मचाऱ्यांचो भोवमान केलो. नितळ ग्रामपंचायतींतल्यान उत्तरेंतल्यान कोलवाळ जाल्यार दक्षीणेंतल्यान कुट्टी-खांडेपार पंचायतीक इनाम भेटयलें. पुराय राज्यांत नितळ पंचायत म्हूण चिखली पंचायतीन मान मेळयलो. उत्कृश्ट गटविकास अधिकारी म्हूण दिवचलचे ओंकार मांजरेकार हांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
