भांगरभूंय | प्रतिनिधी
भौशीक सुवातेर कोयर उडोवपाचे प्रकार आमकां नवे न्हय. सोशल मिडियाक लागून तें व्हायरलूय जाल्यात. पूण, ताका लागून कोण निरशेता, आत्महत्याय करता. पयर रातीं पावणे एकांक म्हापशेंच्या गांवसा वाड्यार एका 23 वर्सांच्या तरणाट्यान पिस्तुलान फार पेटोवन आत्महत्या केली. पुराय गोंयाक अस्वस्थ करपी ही गजाल. हें जावंक जायनाशिल्लें. कोयर उडयतना व्हिडियो काडप्यान ताचे कडेन वाद घालो आनी पुलिसांनी रोखडोच तरणाट्याक पुलीस स्टेशनार आपोवन नोटीस दिली. ट्रोलींग, बदनामी, भंय, लज, नोटिशेचो तणाव, अपराधी भावना, लोकांचे प्रतिक्रियेचो परिणाम…. हाका लागून अस्वस्थ जाल्ल्यान त्या तरणाट्यान हें पावल उखल्लां आसतलें. कोणें तरी ताका समजावंक जाय आशिल्लो.
तांबडें टी- शर्ट घाल्लो हो तरणाटो रस्त्या कुशीक कोयर उडयतनाचो व्हिडियो बिरेस्तारा सोशल मिडियाचेर व्हायरल जालो. भौशीक भलायकेक धोको निर्माण केल्ल्याच्या आरोपा खाला म्हापशें पुलिसांनी तरणाट्याचेर गुन्यांव दाखल केलो. ताका आपोवन नोटीस दिली, तेन्ना थंय 2- 3 वरां बसोवनूय दवरला आसतलो. विद्यार्थी म्हणटकच ताका समजिकायेन हाताळपाक जाय आशिल्लो. पुलीस स्टेशनार नेमकें कितें जालें, ताचेर उजवाड पडटलो? व्हिडियो काडप्यान ही पुलीस कागाळ केली काय पुलिसांनी आपूण जावन ताची दखल घेतली? सध्या सोशल मिडियाचेर ह्या प्रकरणान खवदळ घाला. ‘आपणें कोयर, उक्त्यार सोरो पियेवप, घाणयारें उदक हाचे आड कितल्योश्योच कागाळी केल्यो, पूण पुलिसांनी मात्तूय दखल घेवंक ना. मागीर हीच कारवाय इतले तत्परतेन कशी केली’ असो प्रस्न एका म्हापशेंकारान केला. ‘व्हिडियो काडप्याची भाशा बरोबर नाशिल्ली’, अशें थोड्यांक दिसता. ‘तो थंय कोयर उडोवपाक आयलो, कारण कोयराचीं बल्लां उणीं आसात, पालिका घरांतलो कोयर नेमान उखली ना’, अशेंय एक- दोगांक दिसता. ‘ताका पिस्तूल कशें मेळ्ळें’ असो प्रस्नूय एकल्याक पडला.
चूक जाल्यार ती सुदारपाची संद त्या मनशाक दिवंकूच जाय. पूण चूक करप्याची भौशीक बदनामी वा ट्रोलींग करप योग्य न्हय. सोरो पियेवन अपघात करपी, गुन्यांव करपी हांचे बाबतींत एकवेळ समजूं येता. पूण, ‘कोणेंय येवचें आनी तकलेर कूट मारून वच्चें’ असले प्रकार वाडल्यात. चलयेन मिनीस्कर्ट घालून व्हिडियो काडलो जाल्यार तिका भारतीय संस्कृताये पसून सभ्यताये मेरेन बौद्धीकां दिवप्यांचो आंकडो हालींसराक खूबच वाडला. मागीर ती चली संवेदनशील आसल्यार चुकीचें पावल उबारपाक शकता. समाजांत कितें चुकीचें दिसल्यार सभ्य भाशेंत सांगपाक मेळना?
कायदो कितें तें करपाचो. सोशल मिडियाचेर न्यायनिवाडो नाका आशिल्लो. पूण हांगा सगलेच न्यायाधीश जातात. अपेस, अपमान, टिका, चूक जाली म्हूण जीण सोंपना आनी ती कोणेंच बळयां सोंपोवंक जायना. कुटुंबान, ताच्या इश्टांनी ताका मानसीक आदार दिवंक जाय. कोयराचे बाबतींत सांगपाचें जाल्यार, भौशीक जाग्यांचेर कोयर उडोवप हाची परतून परतून जाणीव करून दिवंक जाय. प्रत्येक जाग्याचेर कोयरा बल्ल दवरूंक जाय. तें सद्दां निवळ करूंक जाय. पांचवे यत्ते सावन नितळसाणे विशीं भुरग्यांक सांगपाक जाय. चूक करप्याक ख्यास्त जावंक शकता, पूण ताची पुराय जीण उद्ध्वस्त जातली इतलें व्हडलें समाजीक चेपण निर्माण जावप चुकीचें. एके चुकी परस मनशाचें जिवीत चड म्हत्वाचें. नितळसाणे वांगडाच आमी मनीसपणूय जपपाक नाका? चूक ही शिकपाची एक संद आसता, ती जीण सोंपोवपाचें कारण जावंक जायना. नितळ गांव आनी संवेदनशील समाज एकठांय आयल्यारूच खरी उदरगत जातली.
लायक, शॅर मेळोवपाक, शायन मारपाक उठसूठ कितेंय सोशल मिडियाचेर घालपी आनी राखणदार जाल्ले भशेन विचार करिनासतना उलोवपी, कमेंट घालपी हांकां हे घडणुकेन इल्लो तरी वचक बसतलो?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
