भांगरभूंय | प्रतिनिधी
पणजी : ‘म्हजें घर’ येवजणे खाला घरां नियमीत करपाक परवाने दिवपाक कांय कोमुनिदाद उशीर करतात. मात कांय वर्सां आदीं ह्याच कोमुनिदादीनीच अशा मनशांक आपल्या जाग्यार घरां बांदपाक परवानगी दिल्ली. तेन्ना कोमुनिदादीनी केल्ल्यो चुको मान्य करून आतां ‘म्हजें घर’ येवजणे खाला त्यो सुदारपाचो यत्न करपाक जाय, अशें मत महसूल मंत्री बाबुश मोन्सेरात हांणी उक्तायलें.
बुधवारा भाजप पणजी मंडळा वतीन प्रधानमंत्री नरेंद्र मोदींच्या कार्यकाळाक बारा वर्सां पुराय जाल्ले खातीर केल्ले कार्यावळी उपरांत तांणी माध्यमां कडेन संवाद सादलो. बाबुश हांणी म्हणलें, गोंयांत कोण भायल्यान आयलो आनी कोमुनिदाद जाग्यार रोखडेंच घर बांदलें अशें जावंक ना. समजा १९९० वर्सा कोणेंय अशे सुवातेर घर बांदलां जाल्यार तेन्नाचे कोमुनिनादीन तांकां परवानगी दिल्ली. कांय जाणां कडेन हाची पोच पावतीय आसा. हाका लागून ही चूक कोमुनिनादचीच आसा. कोमुनिदाद ही स्वतंत्र संस्था. सरकार फकत ताचेर देखरेख दवरता. कोमुनिदादींतूय वेंचणुको जातात. असल्या मनशांक जागो दिवपाचो निर्णय सरकाराचो नाशिल्लो. आपली मालमत्ता राखप ही सरकारची न्हय कोमुनिदादची जापसालदारी. जाल्ल्यो चुको सुदारून हो विशय कायमचो सोडोवप गरजेचें, अशें तांणी म्हणलें.
गोंयच्या मनशांक मजत करपा खातीर ‘म्हजें घर’ येवजण सुरू केल्या. कांय लोका हाका जरी विरोध करता आसात तरी ताचो फायदो थळावे जनतेक जातलो. आयज आमी प्रधानमंत्री नरेंद्र मोदींचे बरे भलायके खातीर प्रार्थना केली. तांच्या कार्यकाळांत भारता सयत गोंयांतूय नेटान उदरगत जाता.
लोकशायेंत लोकांच्या मतांक म्हत्व आसता. लोकप्रतिनिधींनी बरें काम केल्यार लोक तांकां परत संदी दितात. भाजप सरकारन केल्लीं उदरगतीचीं कामां पळयल्यार गोंय विधानसभा तशेंच २०२९ च्या लोकसभा वेंचणुकेंत भाजपाक परत येस मेळटलें हें नक्की आसा.
मंत्र्यां कडेन चर्चा करतलों
बाबुश हांणी, कांपालचें फुटबॉल मैदान जीसुडान बांदलां. ही जमीन नगर-नियोजन खात्याची. कांय कारणांक लागून मैदान आजूनय पणजी महानगरपालिकेकडेन हस्तांतरीत जावंक ना. हे विशीं तशेंच मैदानाच्या वापराविशीं आमी नगर-नियोजन मंत्र्यां कडेन चर्चा करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
