भांगरभूंय | प्रतिनिधी
पेडणें : ‘तुकां मायकल लोबो जाय?’ अशें म्हणीत पांच गुंडांनी तोंडाक बुरखो बांदून मांद्रेंचे आदले सरपंच महेश कोनाडकार हांचेर खुनी हल्लो करपाची घडणूक बुधवारा आस्काववाडो, मांद्रें मठा लागसारा घडिल्ली. मांद्रें पुलिसांनी कारवाय करून ह्या प्रकरणांत दोग दुबावितांक ताब्यांत घेतल्यात. तशेंच दुबावितांनी वापरिल्ली मोटार जप्त केल्या.
कोनाडकार हांचेर काल हल्लो जाले उपरांत तांकां रोखडेच तुयें हॉस्पिटलांत उपचारा खातीर व्हेल्ले. थंयच्यान तांकां म्हापशें जिल्लो हॉस्पिटलांत धाडिल्ले.
मजगतीं तुयेंच्या हॉस्पिटलांत जखमी अवस्थेंत आशिल्ले कोनाडकार हांची आमदार मायकल लोबो, मांद्रेंचे आदले आमदार दयानंद सोपटे, मांद्रेंचे सरपंच मिगेल उर्फ रोजा फर्नांडीस, आदले सरपंच अमित सावंत, आदले सरपंच प्रशांत उर्फ बाळा नायक, आदले सरपंच प्रदीप हडफडकार, बाबूसो हडफडकार, उपसरपंच तारा हडफडकार, धारगळचे आदले सरपंच भूषण उर्फ प्रदीप नायक, पंच किरण सावंत, सुदेश सावंत, जिल्लो वांगडी सतीश शेटगांवकार, देवेंद्र प्रभुदेसाय आनी हेरांनी येवन विचारपूस केली.
कोनाडकार हांची भेट घेवपा खातीर जे आमदार, सरपंच, पंच आनी हेर बरें मागपी हॉस्पिटलांत आयिल्ले त्या सगळ्यांनी दुबावितांक बेगीन अटक करपाची मागणी केल्ली. पुलिसांक ह्या दुबावितां मदल्या दोगांक ताब्यांत घेवपाक सध्या येस आयलां. ह्या २४ वरां भितर मांद्रें पुलिसांनी हल्लो करपा खातीर वापरिल्ली गाडीय जप्त केल्या. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
