भांगरभूंय | प्रतिनिधी
कच्छ वाठारांत पयर रातीं सुमार 1180 कोटींचें कोकेन जप्त केलें. आंकडो आयकून कोणाकूय धपको बसतलो. मात, फाटलीं 30- 35 वर्सां हे प्रकार चलतात. आदल्या तेंपार इलेक्ट्राॅनीक घडयाळी, भांगराच्या बिस्कुतींचें बी स्मगलींग जातालें, मात घुंवळे वखदांत (ड्रग्स) पयसो आसा, हें दिसतकच सगले ताचेच फाटल्यान लागले. मजा म्हणल्यार पुलिसांक हाचे फाटले सुत्रधार सांपडनात. मेळटात ते ल्हान मनीस. पुरवण करपी गुपीत उरतात. तांचे वयर मेरेन हात आसतात. तातूंतले कांय जाण तर स्वता ‘वयले’च आसतात खंय. ह्या ड्रग्साच्या धंद्याक लागून देशाची अर्थवेवस्था दुबळी जाल्या, हें आमी विसरूंक फावना. ड्रग्स कांय खिणाची नशा दिता, पूण जिणभराची ख्यास्त दिवन वता. तांचे पसून पयस रावप ही फक्त संवय न्हय, तर स्वताच्या फुडाराची घेतिल्ली जापसालदारकी. कारण वेसन केन्नाच मनशाक तेंगशेर व्हरना, तर ते ताचे सयत, ताच्या सपनांक फोंडांत पुरता! म्हणटकच शाण्यांनी ड्रग्सां पसून पयस रावंक जाय.
कच्छाक कोकेन घेवन आयिल्ली टँकर बोट ब्राझील, मेक्सिको, अमेरिका, कराची मार्गान गुजराताक पाविल्ली. दोगां नायजेरियनांक अटक केल्या. तर तिसरो दर्यांत उडकी मारून पळून गेलो. दिल्लींतल्या द्वारका वाठारांत रावपी दोगांक हें ड्रग्स पावोवपाक ते आयिल्ले खंय. मुंद्रा दर्यादेगे पसून साडेणव किलोमिटर दर्यांत ही बोट उबी राविल्ली. कोस्ट गार्डांनी हटकिले उपरांत भितरले मनीस पोतयो दर्यांत उडयतना दिसले. तेन्ना तपास यंत्रणेन दुबावान थंय वचून बोट धरून हाडली. ह्या सप्तकांतली ही तिसरी घडणूक. 23 मेक अदिस अबाबा सावन मुंबय आयिल्ल्या एका जोडप्याक विमानतळार धरिल्लें. तांणी कोकेनाच्यो 84 कॅप्स्युल गिळिल्ल्यो. ताचे पयलीं 19 मेक थंयसूनच मुंबय आयिल्ल्या आफ्रिकन नागरिकांक धरिल्ले. तांणीय सवायचार कोटींचें कोकेन गिळिल्लें. कॅप्स्युल पोटांत फुटत जाल्यार मरण वा काळजाचो आताक थारिल्लो. हाचो तांकां मात्तूय भंय दिसना काय? पोरूं 13 एप्रीलाक पोरबंदर (गुजरात) बंदराचेर 1800 कोटींचें ड्रग्स धरिल्लें. 190 किलोमिटर दर्यांत वचून ही कारवाय केल्ली. धरुंक नाशिल्लें ड्रग्स कितलें आसतलें, हाची फक्त कल्पना करची.
भारतांत ड्रग्सांचें चड उत्पादन जायना, तरी व्हडली लोकसंख्या आशिल्ल्यान आमी ड्रग्स माफियां खातीर व्हडली बाजारपेठ थारल्यात. गोल्डन क्रिसेंट (इराण, अफगाणिस्तान, पाकिस्तान) आनी गोल्डन ट्रायंगल (म्यानमार, लाओस, थायलॅण्ड) हे दोन ड्रग्स उत्पादक पट्टे. घुंवळे वखदां येवपाचे हे मार्ग. अफगाणिस्तानांतल्यान पाकिस्तान मार्गान ड्रग्स येता. म्यानमारांतल्यान भारतांत येता. दक्षीण अमेरिकेंतल्यान विमान, दर्या मार्गान येता. जाणकारांच्या मतान, सगले एकमेकांक सामील आसले बगर ड्रग्साची तस्करी शक्य ना. आयात करपी भारतीय मनीस, हवाला नेटवर्क, थळाव्यो गुन्यांवकारी टोळयो, डाॅन, भ्रश्ट सरकारी अधिकारी, आंतरराष्ट्रीय माफिया…. हे टोळयेंत आसतात. राजकी फुडाऱ्यांचो पसून हात आसपाक शकता!! सगलेंच ड्रग्स भारतांत येना, तर तें हांगाच्यान मुखार वता. ताची साबार देशांनी पुरवण जाता. फक्त बोटींच्या धक्यार 2020 ते 2024 मेरेन 11 हजार कोटीं परस चड मोलाचें ड्रग्स धरलां. तपास यंत्रणांच्या मतान, जें धरता तें हिमनगाचें ल्हानशें तोंक. दर्यांत प्रत्येक कंटेनर तपासप अशक्य आसता. 2021 त मुंद्रा बंदरांत 21 हजार कोटींचें ड्रग्स धरिल्लें. गुजराताक व्हडली दर्यादेग आसा, आफ्रिकी देश, पाकिस्तान, अफगाणिस्तान, इराणाक तें लागीं पडटा. म्हणटकच बोटी हांगाच येतात.
ड्रग्स तस्करी ही आतां गुन्यांवकारीची समस्या उरूंक ना, तातूंत आतंकवाद, भ्रश्टाचार, हवाला, तरणाट्यांची वाडटी मागणी, आंतरराष्ट्रीय वेपार पद्दतींतले उणाव सगलेंच घुस्पलां. गरिबी, बेरोजगारी, मानसीक भलायकीय ताका जापसालदार आसा. ड्रग्साचो राकेस वाडचे पयलीं ताची हत्या करपाक जाय!!क
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
