भांगरभूंय | प्रतिनिधी
मडगांव, प्रतिनिधी ः राज्यांतल्या वेगवेगळ्या स्टेशनांचेर रेंट अ बायक सेवा दिवपा खातीर कोंकण रेल्वे म्हामंडळान निविदा जारी केल्ली. हाका थळाव्या वेवसायीकां सयत राजकी पक्षांचो विरोध जालो. सीएमडी झा हांचे मुख्यमंत्री डॉ. प्रमोद सावंत हांचे कडेन जाल्ले बसके उपरांत ही निविदा रद्द केल्या.
थळाव्या लोकांच्या पारंपारीक वेवसायाचेर परिणाम जातलो म्हूण राज्य सरकारान हाची दखल घेवन ही निविदा फाटीं घेवपाक लावची अशी मागणी थळाव्या रेंट अ बायक वेवसायीक, गोवा फॉरवर्डाचे अध्यक्ष आनी आमदार विजय सरदेसाय, बाणावलेचे आमदार व्हेंझी व्हिएगस आनी हेरांनी केल्या. तशेंच दक्षीण गोंय आनी उत्तर गोंय रेंट अ बायक असोसिएशनान हीच मागणी केल्या.
कोंकण रेल्वे म्हामंडळान कोंकण रेल्वे मार्गाचेर सात स्टेशनां वयल्यान रेंट अ बायक सेवा चलोवपाक ऑपरेटर सोदपा खातीर निविदा जारी केल्ली. गोंयांतल्या मडगांव, थिवें, करमळे, काणकोणां सयत कर्नाटक राज्यांतल्या कारवार, गोकर्णा रस्तो आनी कुमटा रेल्वे स्टेशनां वयल्यान ही सेवा सुरू जावपाची आशिल्ली. सगले सात स्टेशनां एकाच कंत्राटा वरवीं चलोवपाचे आसात. 18 जून ही निविदांची निमाणी तारीख आशिल्ली. निविदा जारी जाले उपरांत गोवा फॉरवर्ड अध्यक्ष विजय सरदेसाय हांणी रेंट अ बायक सेवेच्या निविदेक विरोध केलो. थळाव्या लोकांचो दुचाकी भाड्यान दिवपाचो पारंपारीक वेवसाय आसा ताचो कोंकण रेल्वे फायदो घेता अशें सांगून निविदा रद्द करपाची मागणी केल्ली. बाणावलेंचे आमदार व्हेंझी व्हिएगस हांणी मुख्यमंत्री प्रमोद सावंत हांकां पत्र धाडून उल्लेख केल्ली निविदा प्रक्रिया बेगोबेग बंद करपाची मागणी केल्या. तशेंच दुचाकी भाड्यान दिवपाचो थळावो वेवसाय पयलींच लुकसाणांत आसा तेन्ना सरकारान तांच्या वेवसायाक तेंको दिवपाची गरज आसा अशेंय मत तांणी उक्तायले.
कोंकण रेल्वे म्हामंडळाचे मुखेल वेवस्थापकीय संचालक संतोष कुमार झा हांणी मंगळारा मुख्यमंत्री डॉ. सावंत हांची भेट घेतली. हे वेळार मुख्यमंत्र्यान कोंकण रेल्वेन जारी केल्ल्या रेंट अ बायक निविदा विशीं चर्चा केली. ते प्रमाण कोंकण रेल्वे म्हामंडळान रेंट अ बायक निविदा रद्द केल्या अशी म्हायती कोंकण रेल्वे म्हामंडळाचे वरिश्ठ जनसंपर्क अधिकारी बबन घाटगे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
