भांगरभूंय | प्रतिनिधी
डॉ. बालजिंदर नसराली : ‘इक्की दुक्की तिक्की था’ पुस्तकाचें जालें लोकार्पण
वाळपय, प्रतिनिधी ः कोंकणी भाशेंत दर्जेदार साहित्य तयार जावपाक लागलां. लेखक बर्या साहित्याची निर्मणी करता. आतां मेरेन कोंकणी भाशेंत वेगळ्यावेगळ्या विशयांचेर दर्जेदार साहित्य तयार जालां. हें साहित्य संवसारीक पांवड्यार पावप खूब म्हत्वाचें. आनी ते खातीर कोंकणी साहित्याचो अणकार वेगळ्यावेगळ्या भाशांनी जावप गरजेचें आसा. तशें जालें जाल्यारच फुडाराक कोंकणीचें बरें साहित्य वाचप्यांच्या काळजाक हात घालपाक पावतलें अशें दिल्ली विद्यापिठाच्या पंजाबी विभागाचे सहाय्यक प्राध्यापक आनी पंजाबी कादंबरीकार आनी लेखक डॉ. बालजिंदर नसराली हांणी सांगलें.
साहित्य मंथन, सत्तरी हांणी नारायणनगर, होंडा इक्की दुक्की तिक्की था ह्या पुस्तकाच्या लोकार्पण सुवाळ्यांत ते उलयताले. साहित्य अकादेमी बाल पुरस्कार जोडपी प्रकाश पर्येंकार हांच्या इगडी बिगडी तिगडी था ह्या कोंकणी पुस्तकाचो हो हिंदींत अणकार मोहन कुलकर्णी हांणी केला.
ह्या वेळार माचयेर डॉ. बालजिंदर नसराली हांचे वांगडा मुखेल सोयरे ह्या नात्यान नाट्यकर्मी अभय जोग, मानाचे सोयरे ह्या नात्यान नाट्यकर्मी प्रमोद म्हाडेश्वर, मूळ लेखक डॉ. प्रकाश पर्येंकार, अणकारपी मोहनराव कुलकर्णी आनी साहित्य मंथनाचे अध्यक्ष काशिनाथ नायक हांची उपस्थिती आसली.
गोंयांत दर्जेदार साहित्य तयार जाता. तें मागीर जावं कोंकणी वा मराठी. ही खर्यांनीच खोशेची गजाल. कोंकणी लेखक बरे बरे विशय घेवन बरी साहित्य निर्मणी करता. हें साहित्य हेर भाशांच्या वाचप्यां मेरेन पावपाक जाय आनी ते खातीर ताचो अनुवाद जावपाची गरज आसा. तशें जातकच तें साहित्य वाचप्यां मेरेन पावता आनी लेखकाक ऊर्जा आनी उर्बा मेळटा अशेंय डॉ. नसराली हांणी सांगलें.
समाजीक प्रबोधना खातीर नाटक हें सगल्यांत बरें माध्यम. सगल्यो नाट्यसंहिता वेव्हारीक आसनात हें जरी खरें आसलें तरी नाटकां लेगीत वेगळ्यावेगळ्या भाशांनी अनुवादीत जावपाक जाय. तेन्नाच ताचो अनुकुल परिणाम जावंक पावता अशें अभय जोग हांणी सांगलें.
गोंय कोंकणी अकादेमीन आयोजीत केल्ल्या बालनाट्य महोत्सवा निमतान प्रमोद म्हाडेश्वर हांणी दिग्दर्शीत केल्ल्या ह्या पुस्तकाचे वट्ट १७ प्रयोग गोंयच्या वेगळयावेगळ्या वाठारांनी सादर जाल्यात अशीय म्हायती अभय जोग हांणी दिली.
ह्या वेळार मोहनराव कुलकर्णी हांचो मानेस्तांचे हस्तुकीं शाल आनी श्रीफळ दिवन भोवमान केलो. संस्थेचे अध्यक्ष काशिनाथ नायक हांणी येवकार दिलो. साहित्य मंथन ही संस्था जायत्या गांवगिर्या वाठारांनी वेगळेवेगळे उपक्रम चालीक लावन लेखकाक अभिनव साहित्य निर्माण करपाक प्रोत्साहन दिता. तांच्या विचारांक आंकुर येवपा खातीर कार्यावळी घडोवन हाडटात आनी ताका बरो प्रतिसाद मेळटा अशें काशिनाथ नायक हांणी सांगलें.
सत्तरी म्हालांत लेखक तयार जावंक लागल्यात. लेखक सत्तरी म्हालांतल्या सैमाचेरूय न्हय जाल्यार सत्तरींतल्या लोकांचे जिणेचेर बरयतात ही खूब बरी गजाल अशें डॉ. प्रकाश पर्येंकार हांणी सांगलें.
संस्थेचे सचीव महादेव गांवकार हांणी माचयेर हाजीर आशिल्ल्या मानेस्तांक फुलां भेटयलीं. हे कार्यावळीक डॉ. प्रकाश वजरीकार, झिलू गांवकार, विठ्ठल गांवस, गजानन देसाय आनी हेर मानेस्त हाजीर आशिल्ले. समिक्षा शिरोडकार हांणी कार्यावळीचें सुत्रसंचालन केलें. आसावरी कुलकर्णी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
