भांगरभूंय | प्रतिनिधी
पणजी: कोंकणी लेखक संघाचो वर्धापन दीस आयतारा कोंकणी अकादेमीच्या सभाघरांत मनयलो. हो सुवाळो गोवा कोंकणी अकादेमीच्या सहकार्यान आयोजीत केल्लो. सुवाळ्याक तियात्रीस्त, साहित्यीक प्रेमानंद लोटलीकार मुखेल सोयरे म्हणून हाजीर आशिल्ले. ज्येश्ठ साहित्यीक विजया शेल्डेंकार मानाची सोयरी म्हूण हजर आशिल्ली.
कार्यावळीची सुरवात भुरग्यांच्या येवकार गीतान आनी दिवपी पेटोवन जाली. कोंकणी लेखक संघाचे अध्यक्ष गौरीश वेर्णेकार हांणी येवकार दिलो तशेंच मानेस्तांची वळख करून दिली. कोंकणी लेखक संघ राजाश्रयाचेर चलना, तो लोकाश्रयाचेर चलता हें सांगतना तांणी खूब जाणांनी संघाक आर्थीक पालव दिल्ल्याचें सांगलें.
मानेस्तांक सन्मान चिन्न आनी फुलां भेटयले उपरांत लेखक संघाची सचीव अनघा कामत हांणी वर्सुकी अहवाल सादर केलो. उपरांत श्रीकांत शंभू नागवेंकार, सुधा खरंगटे, अरविंद काकोडकर आनी उषा राणे हांचो श्रीफळ, शाल, मानचिन्न आनी मानपत्र दिवन भोवमान जालो. उपरांत श्रीकांत शंभू नागवेंकार आनी उषा राणे हांणी विचार उक्तायले.
प्रेमानंद लोटलीकार हांणी सांगलें, रोमी लिपी बरोवप्यांनी देवनागरी लिपीचो केन्नाच दुस्वास करूंक ना. तांकां देवनागरीचो आदरच आसा. फुडें तांणी कोंकणीचे उदरगती खातीर सुचयतना सांगलें, जल्मदिसाचीं गितां, परबीं गितां, मुजी, लग्नांच्यो, व्होंवळीक पत्रिका कोंकणींतच आसच्यो.
विजया शेल्डेंकार हांणी सांगलें, तरणाटे पिळगेन कोंकणी खातीर तळमळीन काम करूंक जाय.
कोंकणी लेखक संघाचे मुळावण घालपी आदले अध्यक्ष एन. शिवदास हांणी कोंकणी लेखक संघाच्यो आदल्यो यादी सांगल्यो. आतांची तरणाटी पिळगी कोंकणी काम करपाक फुडें सरता ह्या खातीर तांणी खोस उक्तायली. अशेंच तरनाट्यांनी फुडें सरून तातूंत भर घालपाची आनी कोंकणी भाशेची उदरगत करची अशें तांणी म्हणलें.
ह्या सुवाळ्यांत पंढरीनाथ लोटलीकार हांणी बरयिल्ल्या संजिवनी आनी जिद्द ह्या पुस्तकांचें विमोचन प्रेमानंद लोटलीकार हांचे हस्तुकीं जालें. उपरांत स्वरुपा उल्हास नास्नोडकार हांकां फुलां तुरो दिवन सन्मानीत केलें तशेंच हाजीर आशिल्ल्या विद्या प्रबोधिनी विद्यालयाच्या आनी धेंपे कोलेजीच्या विद्यार्थ्यांक प्रमाणपत्रां भेटयलीं. उपरांत कोंकणी लेखक संघाची जोड सचीव निता कुर्टीकार हांणी उपकार मानले. सुत्रसंचालन प्रसाद पागी हांणी केलें.
हास्य कवीसंमेलन
दुसर्या सत्रांत हेमंत अय्या हांचे अध्यक्षते खाला हास्य कवीसंमेलन जालें. तातूंत रुपेश देसाय, उर्जिता भोबे, पंढरीनाथ लोटलीकार, नुतन साखरदांडे आनी गौरीश वेर्णेंकार ह्या कवींनी वांटो घेतलो. कवींनी बर्यो कविता सादर करून कार्यावळीची सोब वाडयली. उपरांत अपर्णा गारुडी हांच्या मार्गदर्शना खाला भुरग्यांची सांस्कृतीक कार्यावळ जाली. हातूंत भुरग्यांनी गितां, नाच, कविता आनी जुगलबंदी सादर केली. ह्या दुसर्या सत्राचें सुत्रसंचालन अपर्णा गारुडी हांणी केलें. तशेंच अनघा कामत हांणी उपकार मानले. हे कार्यावळीची पुराय सजावट कोंकणी लेखक संघाचे उपाध्यक्ष नामदेव सुर्लीकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
