भांगरभूंय | प्रतिनिधी
पणजी ः मॉन्सून सोंपपाक पावला आनी भांगरा कोराचीं शेतां कापणे खातीर तयार जाल्यांत, त्याच वेळार कोंकणी लिरीक्स सर्तींत नव्या गितांचें पीक आयलां. हे सर्तींत स देशांतल्या 54 कोंकणी गीतकारांनी वांटो घेतिल्लो. तांणी 20 वेगळ्या वेगळ्या भाशेंतल्यान 111 संवसारीक सुपरहीट गितांचेर आदारीत 134 कोंकणी गितां बरयल्यांत. ‘माय हॉर्ट विल गो ऑन’ ह्या पदाचेर पांच कोंकणी गितां तयार जाल्यांत. तर ‘आय से यु ते पेगो’ आनी ‘समर ऑफ’ ह्या गिताचेर चार-चार कोंकणी गाती जाल्यांत. मूळ गितां इंग्लीश, इटालियन, हिंदी, मराठी, आसामी, नेपाळी, पर्शियन, पुर्तुगेज, सिंहली, उझ्बेक आनी हेर 20 भाशेतलीं आसात. सगल्यांत चड इंग्लिशी वयल्यान 75 तर हिंदी वयल्यान 27 पदां कोंकणींत तयार जाल्यांत. गितां बरोवपाची भाशा देवनागरी आनी रोमी कोंकणी आशिल्ली, पूण कन्नड लिपयेंतलींय सात कोंकणी पदां मेळ्ळीं. गोंयांतल्यान 110 प्रवेशिका आयल्यो. 26 गांवांतल्या गितकारांनी वांटो घेतलो. हातूंत वास्कोचे सगल्यांत चड 17, पणजेचे 14 आनी मेरशेचे 13 जाण आशिल्ले. सर्तींत वांटो घेवपी 13 ते 80 वर्सां पिरायेचे आशिल्ले. तातूंत दोतोर, वकीलूय आशिल्ले.
सगलीं गितां इन्स्टाग्राम (www.instagram.com/vangddaa/) आनी फेसबुकाचेर (www.facebook.com/vangdda) दिल्यांत. 134 मदल्यो 117 प्रवेशिका आतां तिसऱ्या (निमणी निवड) पांवड्याचेर गेल्यात. वांटो घेवपी आतां डेमो ऑडियो धाडटात. तातूंतल्यो आघाडेच्यो 20 प्रवेशिका ऑक्टोबरा उपरांत लोकांच्या मतदाना खातीर वतल्यो. तातूंतल्यान 10 जैतिवंत वेंचून काडटले. इनामांचे बजेट 1 लाखां वयल्यान 1.4 लाख रुपयां मेरेन वाडयलां. ना फायदो ना लुकसाण तत्वाचेर चलपी उझुर्बा टेक्नोलॉजी एलएलपी (चोडण) हांणी ही सर्त आयोजीत केल्या. चड म्हायती खातीर व्हिन्सेंट तुस्कानो, [email protected], 97654 10020 हांचे कडेन संपर्क करचो, अशें आयोजकांनी कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
