भांगरभूंय | प्रतिनिधी
कोंकणी भाशा मंडळान मनयली पेद्रू कुर्रेय आफोंसची जयंती
पणजी: कोंकणी भास आनी गोंयकारपण सांबाळपा खातीर तरणाट्यांनी एकवटान आनी एकचारान वावुरचें असो उलो नामनेचे मानसशास्त्र तज्ञ डॉ. राजेंद्र हेगडे हांणी मारलो.
कोंकणी भाशा मंडळान विद्याभुवन कोंकणी शाळा आनी रवीन्द्र केळेकार ज्ञानमंदीर हांच्या जोड-पालवान पेद्रू कुर्रेय आफोंस हांची जयंती व्हडा उमेदीन मनयली. मडगांवच्या कोंकणी भवनांत ही कार्यावळ घडोवन हाडली. ह्या वेळार कोंकणी भाशा मंडळाची अध्यक्ष अन्वेषा सिंगबाळ, शाळा वेवस्थापन समितीचे अध्यक्ष चेतन आचार्य, रवीन्द्र केळेकार ज्ञानमंदीराचे अध्यक्ष प्रशांत नायक, रवीन्द्र केळेकार ज्ञानमंदीराचे मुख्याध्यापक अनंत अग्नी, विद्याभुवन कोंकणी शाळेची मुखेली अक्षता व्यास आनी पालक शिक्षक संघाची अध्यक्ष स्मिता आळवे हाजीर आसली.
पेद्रू कुर्रेय आफोंस एक बुदवंत मनीस आसलो. तांणी सदांच गोंयचे भूंयेचेर आनी गोंयच्या सैमाचेर मोग केलो. तांचें घराणें हें स्वातंत्र सैनिकांचें. रॉक कुर्रेय आफोंस हो तांचो बापूय तांणी स्वातंत्र चळवळी खातीर व्हड काम केलां. तांचे कडल्यान प्रेरणा घेवन पेद्रूबाब घडले. कोंकणीची सेवा करतनाच हेर सामाजीक मळारय तांणी योगदान दिलां. ह्या तांच्या कामाचो आनी कार्याचो आमी उगडास काडूंक जाय. बरी कामा करतना बरे नागरीक जावप हेय आमचें कर्तव्य जावन आसा अशें डॉ. हेगडे हांणी उलयतना सागलें.
पेद्रू बाबांचो वावर व्हड जावन आसा, कोंकणी भास, कोंकणी साहित्य ह्यामळार तांणी खूब वावर केला. पूण हो तांचो हावेस तितल्या पुरतोच नाशिल्लो. हेर सामाजीक मळारय तांणी उल्लेखनीय वावर केला. तांचे कडल्यान प्रेरणा आमी घेवपाची गरज आसा अशें अन्वेषा सिंगबाळ हांणी सांगलें.
म्हापुरसांच्या जयंतींचो आदर्श दोळ्यां मुखार दवरून बरी व्यक्तीमत्वां घडची होच आमचो हावेस आसता. पेद्रूबाब हे व्हड गोंयकार आशिल्ले अशें उपकार मानतना अनंत अग्नी हांणी सांगलें.
सुत्रसंचालन वेदा खांडेपारकार आनी अमेया झांटये हांणी केलें. आद्या गांगुली हाणें पेद्रू बाबांचेर कविता वाचली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
