भांगरभूंय | प्रतिनिधी
डॉ. साेनिया सिरसाटः सांखळी कोंकणी केंद्रान मनयलो राजभास दीस
केरी-सत्तरी: कोंकणी मनशांनी संस्कारी भास उलोवंक जाय. तांणी कोंकणीचो मोग करून तिचो अभिमान बाळगूंक जाय, आनी तिचो वापर चडांत चड करूंक जाय अशें उलोवप सांखळेच्या सरकारी म्हाविद्यालयाची पालवी प्राचार्य डॉ. सोनिया सिरसाट हांणी केलें.
त्यो सांखळेच्या कोंकणी सेवा केंद्रान आयोजीत केल्ल्या वर्सुकी राजभास दीस सुवाळ्यांत मुखेल सोयरी ह्या नात्यान उलयताल्यो. ह्या वेळार मानाचे सोयरे म्हूण सीताराम वालावकार हाजीर आसले.
वालावकार हांणी आपल्या उलोवपांत कोंकणी सेवा केंद्राच्या वावराची तुस्त केली, आनी केंद्राचे हे आवयभाशेचे सेवेक आपलो सदांच तेंको आसतलो म्हणपाचें उतर दिलें.
केंद्राचे अध्यक्ष राजन शेट्ये हांणी आपल्या येवकाराच्या उलोवपांत राजभास दिसाचें म्हत्व विस्कटावन सांगलें. तेच प्रमाण केंद्र करीत आशिल्ल्या विंगड विंगड कार्यावळींची म्हायती दिली.
अनुपा वेरेंकार हांणी मानेस्तांची वळख करून दिली. उद्देजक दादा आमोणकार हांणी सोयऱ्यांक यादस्तिकां भेटयलीं. संस्थेचे आदले अध्यक्ष अनील वेर्णेंकार हांणी उपकार मानले. पुराय कार्यावळीचें सुत्रसंचालन सचीव प्रा. रघुदास तारी हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
