‘कोंकणी भाशा, साहित्य, शिल्पकार कोश’ : म्हायती दिवपाचें आवाहन

भांगरभूंय | प्रतिनिधी

गोवा कोंकणी अकादेमीची भौसाक विनवणी

पणजी: गोंय सरकाराची गोवा कोंकणी अकादेमी, कोंकणी भास आनी संस्कृतायेचो गिरेस्त इतिहास सांबाळून दवरपाच्या उद्देशान ‘कोंकणी भाशा, साहित्य, शिल्पकार कोश’ तयार करपाचो एक व्हड प्रकल्प हातांत घेता. कोंकणी चळवळ, साहित्य, लोककला, संगीत, सिनेमा, शिक्षण, संशोधन, कोंकणी माचे वयले कलाकार आनी भाशा उदरगती खातीर ज्या म्हालगड्यांनी, कार्यकर्त्यांनी, बरोवप्यांनी आनी कलाकारांनी मोलाचें योगदान दिलां, अशा व्यक्तींच्या कार्याची अधिकृत नोंद करून तांची वळख फुडले पिळगेक करून दिवप, हो ह्या कोशाचो मुखेल उद्देश आसा.
हो कोश सविस्तर आनी परिपूर्ण जावचो, ह्या खातीर अकादेमीन सकयल्या विंगड-विंगड मळां वयल्या जाणकारांची म्हायती मागयल्या.

1. म्हायतीचे गट:
    भाशा चळवळ: कोंकणी चळवळींत प्रत्यक्ष वा अप्रत्यक्षपणान वांटो घेतिल्ले झुजारी आनी कार्यकर्ते.
    साहित्य: कवी, कादंबरीकार, कथाकार, निबंदकार, अणकारपी, बालसाहित्यीक आनी सगळ्या कोंकणी बोलींनी साहित्य निर्माण करपी बरोवपी.
    कोंकणी रंगमाची आनी कला: नाटककार, दिग्दर्शक, सिनेमा कलाकार, तियात्रिस्त, संगीतकार, नृत्यकलाकार आनी लोककलाकार.
    संशोधन आनी शिक्षण: कोंकणी भाशाशास्त्रज्ञ, शब्दकोशकार, शिक्षक, प्राध्यापक आनी संशोधक.
    पत्रकारिता आनी डिजिटल माध्यम: कोंकणी दिसाळीं, नेमाळीं, आकाशवाणी/टीव्ही तशेंच डिजिटल माध्यमांतल्यान (Social Media/Blogs) कोंकणी खातीर वावुरपी.
2. म्हायतीचें स्वरूप : हो कोश संवसारीक पांवड्यार एक मोलाचो ‘दस्ताऐवज’ म्हूण वळखुपा खातीर, म्हायती दिवप्यांनी सकयल दिल्ल्या गजालींचो आस्पाव करचो:
    वयक्तीक म्हायती: पूर्ण नांव, घरचो नामो, जल्म तारीख, शिक्षण, संपर्क क्रमांक आनी इमेल.
    कार्याची नोंद: उजवाडाक आयिल्लीं पुस्तकां, केल्लीं नाटकां/ तियात्र/ सिनेमा. सादरीकरण, सामाजीक वावर आनी कोंकणी भाशे खातीर दिल्लें खाशेलें योगदान वा वावर.
    पुरस्कार: सरकार वा मानादीक संस्थां कडल्यान मेळिल्ले मान-सन्मान.
    फोटो : म्हायती वांगडा संबंदीत व्यक्तीचो सुस्पश्ट पासपोर्ट सायज फोटो जोडप अनिवार्य आसा.
    वयली पुराय म्हायती 500 उतरांनी कोंकणी देवनागरी लिपींतल्यान फक्त UNICODE – INSCRIPT हातूंतल्यान टायप करून (Word File) अकादेमीक दिवची पडटली.
   संबंदीत व्यक्तींनी आपली म्हायती स्वता भरची. तशेंच, ज्या म्हालगड्यांनी कोंकणी खातीर आयुश्य सारलें पूण आयज ते आमच्यांत नात, अशा व्यक्तींची म्हायती तांच्या कुटुंबियांनी वा वळखीच्या जाणकारांनी दिवची. तशेंच अशें तरेचे कर्तृत्ववान व्यक्ती आसल्यार तांचीय म्हायती अकादेमी कडेन पावोवची, अशें आवाहन गोवा कोंकणी अकादेमी करता.
   सकयल दिल्ल्या गुगल दुव्याचेर (Link) म्हायती भरची:
   https://forms.gle/BwSPJaHNdetkbhWX9
   कोंकणी अकादेमीन नेमिल्ल्या खास जाणकारांच्या मंडळा वरवीं ह्या कोशाचो वावर मुखार वतलो. कोंकणी भाशा आनी संस्कृतायेच्या ह्या कार्यांत आपलो मोलाचो हातभार लावन कोंकणी अस्मितायेचो हो दस्ताऐवज तयार करपाक सगळ्या कोंकणी मोग्यांनी सहकार्य करचें, अशें आवाहन गोवा कोंकणी अकादेमी करता.