भांगरभूंय | प्रतिनिधी
पणजी : गोंयच्या कोंकणी भाशा मंडळान साहित्य, बाल साहित्य, अणकार, युवा साहित्य पुरस्कार अशा वेगळ्या वेगळ्या पुरस्कारां खातीर पुस्तकां मागयल्यांत. अंदूं 30 सप्टेंबराक कोंकणी भाशा मंडळाक 64 वर्सां पुराय जातात आनी त्या निमतान 2 ऑक्टोबराक जावपी कार्यावळींत हे पुरस्कार जैतिवंतांक भेटयतले. हे पुरस्कार रॉक बार्रेटो साहित्य पुरस्कार, श्रीधर कामत साहित्य पुरस्कार, रमेश वेळुस्कार साहित्य पुरस्कार, डॉ. मनोहरराय सरदेसाय बालसाहित्य पुरस्कार, रामनाथ मणेरकार अणकार पुरस्कार, फा. मोरेन डिसौझा युवा साहित्य पुरस्कार हांच्या नांवान दवरल्यात.
1 जानेवारी 2024 ते 31 डिसेंबर 2025 ह्या काळांत उजवाडाक आयिल्लीं कथा, कविता, नाटक, तियात्र, कादंबरी, एकांकी, निबंद, संशोधन आनी अणकार ह्या प्रकारांतलीं नागरी आनी रोमी लिपयेंत बरयिल्लीं पुस्तकां पुरस्कारा खातीर पात्र आसतलीं.
लेखक वा प्रकाशकान आपल्या पुस्तकांच्यो चार प्रती सचीव, कोंकणी भाशा मंडळ, कोंकणी भवन, शंकर भांडारी मार्ग, विद्यानगर, घोगळ- मडगांव हांकां 28 जुलय मेरेन पावोवपाची विनवणी सचीव मंगलदास भटान केल्या. साहित्य अकादेमी पुरस्कार मेळिल्ल्या साहित्यकारांच्या तशेंच हेर राष्ट्रीय पुरस्कार मेळिल्ल्या साहित्यकारांच्या पुस्तकांचो ह्या पुरस्कारां खातीर विचार जावचो ना. तशेंच, आदीं कोंकणी भाशा मंडळाचो त्याच प्रकारांत साहित्य पुरस्कार मेळिल्ल्या साहित्यकारांच्या पुस्तकांचो पुरस्कारा खातीर विचार जावचो ना अशें श्री. भट हांणी फुडें स्पश्ट केलां.
हेर पुरस्कार
फेलिस्यू कार्दोझ कोंकणी शिक्षक पुरस्कार (शालेय पांवड्यार), माधवी सरदेसाय शिक्षक पुरस्कार (उच्च माध्यमिक विद्यालय, म्हाविद्यालय, विद्यापीठ पांवड्यार), जुझे क्वाद्रूश कार्यकर्तो पुरस्कार, लिगोर फुर्तादो ट्रस्ट पत्रकारिता पुरस्कार, चंद्रकांत केणी स्तंभ लेखन पुरस्कार आनी कोंकणी भाशा मंडळ सेवा पुरस्कारा खातीर शिफारशी मागयल्यात. ह्या पुरस्कारां खातीर कोणूय जांचें नांव सुचयतले तांची सविस्तर म्हायती वांगडाच धाडची, अशेंय श्री. भट हांणी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
