भांगरभूंय | प्रतिनिधी
‘काजू फेस्त 2024’ चो उक्तावण सुवाळो व्हडा दबाज्यान
पणजी, बातमीदार ः गोंय रान उदरगत म्हामंडळान घडोवन हाडिल्ल्या ‘काजू फेस्त 2024’ चो उक्तावण सुवाळो कांपाल मैदानार व्हडा दबाज्यान जालो. तीन दिस चलपी ह्या सुवाळ्यांत कोंकणी कविता सर्तीन फावो जाल्ले पयलें पंचवीस हजार रुपयांचें इनाम तुळशी भोमकार हे युवा कवयित्रीन कला आनी संस्कृती मंत्री गोविंद गावडे हांचे हस्तुकी स्विकारलें. ह्या वेळार माचयेर रान उदरगत म्हामंडळाची अध्यक्ष आमदार डाॅ. देविया राणे, गोंय पर्यटन उदरगत म्हामंडळाचे अध्यक्ष गणेश गांवकार, तशेंच वास्कोचे आमदार कृष्णा साळकार, मुखेल रान संरक्षक कमल दत्ता आनी प्रवीण कुमार हाजीर आशिल्ले.
हे सर्तींतलें दुसरें वीस हजारांचें इनाम आर्या धारगळकार जाल्यार तिसरें पंदरा हजारांचे इनाम सारंग अग्रासनी हांकां फावो जालें. उमेद वाडोवपी इनाम सिद्धांत खांडेकार हांकां फावो जाले. हे सर्तींत गोंय तशेंच देशाच्या हेर वाठारांतल्या वट्ट 66 कोंकणी कवींनी वांटो घेतिल्लो.
इंग्लीश कविता सर्तीतल्या जैतिवंत कवींचोय ह्या वेळार भोवमान केलो. इंग्लिश कविता सर्तीन पयलें पंचवीस हजारांचें इनाम लायना आल्मेदा, दुसरें वीस हजारांचें इनाम आल्दिया गोन्साल्वीस आनी तिसरें पंदरा हजारांचें इनाम मुस्कान दोशी हांकां फावो जालें. पांच हजारांचें उमेद वाडोवपी इनाम क्रिस्तीन फर्नांडीस इ मार्टीन्स हांकां फावो जालें.
कोंकणी सर्तीचें परिक्षण काशीनाथ नायक आनी गोपिनाथ गांवस हांणी केलें. जाल्यार इंग्लीश कवितांचें परिक्षण सुभाष करमळकार आनी डॅनियल डिसौझा हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
