कोंकणीचें म्हत्व दिसान दीस वाडत आसा: डॉ. प्रमोद सावंत

भांगरभूंय | प्रतिनिधी

सांखळे शंकर भांडारी यादस्तीक सुवाळो दबाज्यान

केरी सत्तरी: कोंकणीचें म्हत्व दिसान दीस वाडत आसा. कोंकणी भाशेचें गिन्यान सरकारी अधिकार्‍यांक अनिवार्य जालां. कोंकणी अणकाराक वाडटी मागणी आसा. ते खातीर विद्यार्थ्यांनी गंभीरतायेन कोंकणीचें अध्ययन करूंक जाय अशें उलोवप मुख्यमंत्री डॉ. प्रमोद सावंत हांणी सांखळे केलें. ते 38 व्या शंकर भांडारी यादस्तीक सुवाळ्यांत उलयताले.
ह्या सुवाळ्यांत सांखळेचे आदले नगराध्यक्ष आनी समाजसेवक धर्मेश सगलानी हांचो मुख्यमंत्री डॉ. प्रमोद सावंत हांचे हस्तुकीं भोवमान जालो.
मानाचे सोयरे नितीन कुंकळ्ळकार हांणी म्हायती आनी तंत्रगिन्यान हांचे म्हत्व विद्यार्थ्यांक सांगलें. ही मळां भोवच जलद गतीन मुखार वचत आसात. ते खातीर विद्यार्थ्यांची साधना गतीशील जावंक जाय.
जण एका विद्यार्थ्याक आपले भुंयेचो इतिहास खबर आसूंक जाय. विद्यार्थ्यांनी मोबायला पसून पयस रावचें पूण पुस्तकां कडेन लागीं येवचें अशें प्रशांत नायक हांणी विद्यार्थ्यांक सल्लो दितना सांगलें.
ह्या सुवाळ्यांत सांखळेच्यो नगराध्यक्षा सिद्धी प्रभू, वेवसायीक सतीश माशेलकार हांचींय उलोवपां जालीं.
सुरवेक केंद्राचे अध्यक्ष राजन शेटये हांणी प्रस्तावनां करून समेस्तांक येवकार दिलो. सचीव प्रा. रघुदास तारी हांणी फाटल्या वर्साच्या वावराचो नियाळ सभाघरा मुखार वाचलो.
ह्या सुवाळ्यांत कोंकणी विशयांत चडावत गूण मेळोवपी वट्ट 26 विद्यार्थ्यांक सोयर्‍यांचे हस्तुकीं इनामां भेटयलीं. हातूंत दोन भांगरा पदकांचो आस्पाव आसा. पुराय कार्यावळीचें सुत्रसंचालन दया तेंडुलकार हांणी केलें. जाल्यार अजंली हळर्णकार हाणें उपकार आठयले.