भांगरभूंय | प्रतिनिधी
नव्यान इंग्लीश मुळाव्या शाळांक मान्यताय ना
पणजी, प्रतिनिधी : जर एखादे संस्थेन कोंकणी शाळे खातीर मान्यताय घेवन ल्हवूच इंग्लीश मुळावी शाळा सुरू केली जाल्यार खर कारवाय करतले, अशी शिटकावणी मुख्यमंत्री डॉ. प्रमोद सावंत हांणी दिल्या. आता नव्यान इंग्लीश मुळाव्या शाळांक मान्यताय मेळची ना, अशेंय तांणी स्पश्ट केलें.
आपत्ती वेवस्थापनाची बसका घेतले उपरांत मुख्यमंत्र्यांनी पत्रकार परिशद घेतली. त्या वेळार ते उलयताले.
राज्यांत इंग्लीश मुळाव्यो शाळा सुरू करपाचे येत्न सुरू आसाक. मुळाव्या इंग्लीश शाळांक विरोध आशिल्ल्याचें पत्र कोंकणी भाशा मंडळान मुख्यमंत्री डॉ. सावंत हांकां बरयलां. हे फांटभुयेर उलयताना डॉ. सावंत हांणी ही म्हायती दिली. मराठी वा कोंकणी शाळांक मान्यताय घेवन इंग्लिशीचे वर्ग सुरू करपाची भिरांत काय संस्थांनी उक्तायल्या. हे प्रकार सरकार सोंसून घेवचो ना. कोंकणी वा मराठी शाळांक मान्यताय घेवन इंग्लीश माध्यमाचे वर्ग सुरू जाले जाल्यार संबंधीत संस्थेचेर खर कारवाय जातली, अशी शिटकावणी डॉ. सावंत हांणी दिल्या.
मुळावे शिक्षण हें आवय भाशेंतल्यान आसपाक जाय, असो सिद्धांत आसा. तशेच काय वर्सां पयली माधव कामत समिती आनी भास्कर नायक समितीन आवय भाशेंतल्यान मुळावें शिक्षण आसपाक जाय, असो अहवाल सादर केल्लो. हाचे उपरांत तेन्नाचे मुख्यमंत्री सर्गेस्त मनोहर पर्रीकार हांणी हे फुडें इंग्लीश मुळाव्या शाळांक मान्यताय दिवप ना, असो निर्णय 2014 वर्सा घेतिल्लो. हे प्रमाण आनीक इंग्लीश मुळाव्या शाळांक मान्यताय मेळची ना, अशें डॉ. सावंत हांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
