कोंकणींत राजपत्रां उजवाडावपा खातीर तज्ञ समिती घडयल्या

भांगरभूंय | प्रतिनिधी

मुख्यमंत्री प्रमोद सावंत हांची विधानसभेंत लेखी जाप

पणजीः गोंयचीं अधिकृत राजपत्रां कोंकणींत उजवाडावपा खातीर अनुवादकांचें पॅनल स्थापन करपाची प्रक्रिया सरकारान चालीक लायल्या. पांच वांगड्यांचें पॅनल सरकारान स्थापन केलां. अधिकृत राजपत्रां टप्प्या टप्प्यान अणकारींत जावचीं अशी सुचोवणी ह्या पॅनलाक दिल्या अशी म्हायती राजभास मंत्री आनी मुख्यमंत्री डॉ. प्रमोद सावंत हांणी लेखी जापेंत दिली.

राजभास संचालनालयांत सरकारी राजपत्रांचे अणकार करपाची सरकाराच्या तयारेची सध्याची स्थिती तशेंच राजपत्रां कोंकणींत अणकार करतना येवपी आडमेळीं पयस करपा खातीर खाजगी अनुवादक घेवपाचो छापणावळ आनी स्टेशनरी खात्याचो प्रस्ताव आसा काय कितें, असो प्रस्न विरोधी पक्ष फुडारी युरी आलेमांव हांणी विचारिल्लो.

ह्या प्रस्नाक लेखी जाप दितना मुख्यमंत्र्यांनी सांगलें, कोंकणी भाशेचें साहित्य अणकारीत करपा खातीर खाजगी अनुवादक घेवपाचो कसलोच प्रस्ताव छापणावळ आनी स्टेशनरी खात्या कडेन ना. सरकाराची अनुवादकांचें पॅनल स्थापन करपाची प्रक्रिया चालू आसा आनी ते प्रमाण फुडली कारवाय चालीक लागतली.

अधिकृत राजपत्रांचे अणकार करपाक कसलेंच प्रशिक्षण सत्र/कार्यशाळा छापणावळ आनी स्टेशनरी खात्यान घेवंक ना. पूण हींच प्रशिक्षण सत्रां/कार्यशाळा राजभास संचालनालयान छापणावळ आनी स्टेशनरी खात्याच्या जोड पालवान आयोजीत केल्यात. अणकाराच्या कामाचो अभ्यास करपाक आनी तें हातांत घेवपा खातीर राजभास संचालनालयान कार्यशाळा/सत्रां खातीर तज्ञांचें पॅनल स्थापन केलां.

ह्या तज्ञांच्या पॅनलांत पांच वांगडी आसात. हातूंत निवृत्त प्राचार्य तशेंच कोंकणी खातीर राष्ट्रीय अणकार मिशन, म्हैसूरचे अनुवादक/समन्वयक डॉ. नारायण देसाय, वरिश्ठ पत्रकार आनी अनुवादक प्रकाश कामत, कोशकार आनी वरिश्ठ अनुवादक मुकेश थळी, वरिश्ठ पत्रकार आनी अनुवादक संदेश प्रभुदेसाय आनी पत्रकार तशेंच अनुवादक संजय बोरकार हे पॅनलाचे वांगडी आसात.

ह्या पॅनलान 3 ते 7 जुलय 2023 मेरेन पांच दिसांची कार्यशाळा घडोवन हाडिल्ली. हे कार्यशाळेंत राजपत्रांक लागतात ती संबंदीत उतरावळ आनी वाक्यांचे कांय नमुने तयार केल्ले.

हे कार्यशाळे खातीर 76,245 रुपया खर्च आयिल्लो. सरकारी राजपत्रांचें कोंकणींत अणकार टप्प्या टप्प्यांनी हातांत घेवचें अशी सुचोवणी तज्ञ पॅनलाक दिल्या. एकदां पॅनल हें सामकें स्थापन जालें काय फुडाराच्यो प्रशिक्षण कार्यावळी आयोजीत करतले, अशी म्हायती मुख्यमंत्र्यांनी दिली.