कोंकणाचें दायज आनी गोंयची गिरेस्त संस्कृताय आमी सांबाळपाक जायः मुख्यमंत्री डॉ. सावंत

भांगरभूंय | प्रतिनिधी

चिपळूण, प्रतिनिधी ः कोंकण ही एक गिरेस्त भूंय. कोंकणांतल्या दरेकल्याची आपली खाशेली शैली आसा. शिवाजी महाराजाच्या काळासावन कोंकणांत जायतीं प्रतिभावान व्यक्तिमत्त्व जाल्यात. जांणी कोंकणाची संस्कृताय सांबाळ्ळी. आयज लेगीत कोंकणांत वेगळी शैली आशिल्ले प्रतिभावान व्यक्तिमत्त्वां आसात, जे कोंकणाचें सांस्कृतीक दायज सांबाळून दवरतात. सगळ्यांनी मेळून कोंकणी संस्कृतायेचें दायज फुडल्या पिळग्यां खातीर राखून दवरूंया. गोंय कोंकणाच्या कुशीक आशिल्ल्यान गोंय आनी कोंकण हांचो बरो संबंद आसा. सिंधुदुर्गाची मालवणी भास आनी गोंयची कोंकणी हांचे मदीं सारकेंपण आसा अशें गोंयचे मुख्यमंत्री डॉ. प्रमोद सावंत हांणी सांगलें.
लोकमान्य टिळक स्मारक वाचन मंदिर आनी अरविंद जाधव अपरान्त संशोधन केंद्रान चिपळूणांतल्या ब्राह्मण सहाय्यक संघ हॉलांत आयोजीत केल्ल्या ‘अपरान्त भूषण पुरस्कार’ कार्यावळींत ते उलयताले. हो पुरस्कार डॉ. प्रमोद सावंत हांचें हस्तुकीं ‘इन्फिगो आय केअर’ चे संचालक डॉ. श्रीधर ठाकूर हांकां काल शुक्रारा सांजवेळार भेटयलो.

ह्या वेळार उलयतना डॉ. सावंत हांणी सांगलें, संस्कृताय तिगोवन दवरतना पर्यटन उदरगत आनी उद्देग वाडोवन कोंकण आनी देशाची व्हडवीकाय साध्य करपाचे यत्न करचे. हाचे खातीर डॉ. ठाकुर हांचे सारक्या लोकांनी फुडाकार घेवचो. चिपळूणांतल्या लोकमान्य टिळक स्मारक वाचन मंदिराचें काम प्रेरणादायी आसा. तुमी सगळे लोक कोंकणाचें सांस्कृतीक दायज सांबाळून दवरतात. डॉ. ठाकुर हांचो वावर प्रेरणादायी आसा. पूण तो तरणाट्यां मेरेन पावप म्हत्वाचें. अशा प्रतिभावान लोकां कडल्यान प्रेरणा घेवनच कोंकणांतले तरणाटे सक्षम जातले.
ह्या वेळार मुख्यमंत्री सावंत हांणी प्रधानमंत्री नरेंद्र मोदी हांचे विकसीत नवो भारत ह्या फुडल्या 25 वर्सांच्या सपनांचो उल्लेख करुन ते साकार करपाक डॉ. ठाकूर सारक्या लोकांची समाजाक गरज आसा अशें सांगलें.