कॉफी एक माध्यम!

भांगरभूंय | प्रतिनिधी

‘अ लॉट कॅन हॅपन ओव्हर अ कप ऑफ कॉफी’ ही एक फामाद म्हण. एक कप कॉफी घेतां घेतां खूब कितें सुचता, खूब कितें घडटा आनी खूब कितें घडूंक शकता हें सत कोणच नाकारचो ना.
कॉफी एक माध्यम: अभिव्यक्तेचें माध्यम! सगळ्यांकच कॉफी आवडटाच अशें ना पूण अशेय लोक आसात जांचो कॉफी घेतले बगर दीस फुडें सरना. खूब जाण पुरो जाल्ले कुडीक तरतरी दिवंक कॉफी घेतात जाल्यार खूब जाण कामार आनीक बरें लक्ष लागचें हें खातीर कॉफी पितात. ‘एक कप कॉफी?’ अशें म्हणीत कांय काळजां जुळ्ळ्यांतय आनी कांय तुटल्यांतय. खरेंच, ”अ लॉट कॅन हॅपन ओव्हर अ कप ऑफ कॉफी.”
भुरगेपणा सावन कॉफी म्हजे आवडीची. ती मागीर थंड जांव वा हुनहुनीत. कॉफीचो मग हातांत घेतलो की हांव त्या कॉफींत जणू विर्गळूंक लागता आनी म्हाका जिविता कडेन एके वेगळे दृश्टीकोनान पळोवपाची उमेद जागता. मन खुशाल आसता तेन्नाय कॉफी उखलून धरता आनी विचारांत बुडिल्लें आसता तेन्नाय कॉफी सांबाळून घेता. म्हजे खातीर, काळजा भितर धाडटा ताका एक वाट दाखोवचे खातीर म्हजो हात धरता ती म्हळ्यार कॉफी!
एक कप कॉफी घेतना खूब कितें घडूंक शकता हें जरी खरें आसलें, तरी एक कप कॉफी घेवन हांव खूब कितें करूंक शकतां हाजी जाणीव म्हाका तेन्ना जाली जेन्ना हेच कॉफयेंत म्हजो पेंट ब्रश बुडलो आनी कॅनवासाक चिंवलो. हांव अभिव्यक्त जायत गेलें तशें मन हलकें जायत रावलें आनी तेन्ना म्हाका जाणवले… ‘हय, खूब कितें करूंक शकता ही कॉफी!’
केन्ना तरी खंय तरी कॉफी पेंटिंग पळयल्ले तेन्ना सावन तें स्वता करून पळोवपाची इत्सा निर्माण जाली. ते राती म्हाका याद आसा… हांवें इंटरनॅटार कॉफी पेंटिंग म्हळ्यार कितें आनी तें कशें करूं येता हें पळयलें आनी समजून घेवपाचो यत्न केलो. पयली पयली पेपरार
करून पळयलें पूण पेपर सगळी कॉफी ओडून घेता हें समजतकूच हांवें फोटो पेपरार म्हजो हात चलयलो. ताचेर जमूंक लागले तेन्ना वेगवेगळे तरेन करून पळोवपाची उमेद वाडली आनी हात बसलो तशें हांवें कॉफी पेंटिंग खातीर कॅनवास वापरूंक सुरवात केली.
एक कपांतली कॉफी म्हज्या ओंठांक लगताली जाल्यार एक कपांत म्हजो पेंट ब्रश बुडटालो. खरें तर कलेचीं सगळीं रुपां अभिव्यक्तेचीं माध्यमां. आनी कलेची आवड आशिल्ले म्हज्यांतले म्हाका म्हज्या मुडानुसार एक एक माध्यमाचो हात धरपाची संवय. कॉफी पेंटिंग म्हज्या मनाक थाकाय दीत म्हाका एक वाट दाखयता. एक कलाकार वेगवेगळे रंग आपणायता आनी तातूंत स्वताक सोदता. म्हाका मात रंगांनी म्हजो सोद लागलोना, हांवें एकाच रंगांत म्हाका वेगवेगळे तरेन सोदलें तेन्नाच म्हाका म्हजो सोद लागत गेलो. म्हाका रंग आवडनात न्ही… एकाच रंगांतले वेगवेगळे भाव अणभवंक आवडटात. त्या रंगाचें मंद रूप तें गडद रूप जेन्ना म्हज्या हाताक लागता तेन्ना खऱ्या अर्थान म्हाका त्या रंगांत म्हजें रूप दिसूंक लागता.
खरेंच, अभिव्यक्त जावंक कॉफी म्हाका खूब आधार दिता… मागीर ती म्हज्या ब्रशाक लागून जांव वा ओंठांक लागून! एक मात पटलें..’अ लॉट कॅन हॅपन ओव्हर अ कप ऑफ कॉफी’ जरी खरें आसलें, म्हजें खातीर ‘अ लॉट कॅन हॅपन वीथ अ कप ऑफ कॉफी’ जालें.

रुपाली मावजो किर्तनी
00971506890867