कॉंग्रेस पक्ष सोडून रॉयला हिचो अपक्ष म्हणून अर्ज सादर

भांगरभूंय | प्रतिनिधी

फ्रँक फर्नांडीस, ग्रेफीन्स फर्नांडीस हांणीय भरले अर्ज

मडगांव, प्रतिनिधी : बाणावले जिल्हो पंचायत पोट वेंचणुके खातीर वार्काचे फ्रँक फर्नांडीस, ग्रेफॅन्स फर्नांडीस, कॉँग्रेसचे आदले पदाधिकारी रॉयला फर्नांडीस हांणी अर्ज सादर केल्यात. हाचे पयलीं इंडि आघाडीचो उमेदवार पिमेंता हांणी अर्ज भरला. बाणावले जिल्हो पंचायत पोटवेंचणूक आतां बरीच रंगतली. इंडि आघाडींतल्या पक्षान आम आदमी पक्षाचो उमेदवार पिमेंता हाका फाटबळ दिलां. मात आतां रॉयला फर्नांडीस हांणी काँग्रेस पक्ष सोडून अपक्ष म्हणून निवडणूक अर्ज सादर केला. तशेंच वार्काच्या फ्रँक फर्नांडीस हांणी अपक्ष म्हणून अर्ज सादर केला.

तशेंच बाणावलेच्या लोकांचो आवाज म्हणून ग्रेफॅन्स फर्नांडीस हांणी अर्ज सादर केला. तांचे वांगडा सरपंच झेविअर फर्नांडीस आनी नुस्तेंमार पेले फर्नांडीस हाजीर आशिल्ले. लोकांच्या फाटबळार, समाजीक कार्यकर्त्यांच्या सहकार्यान ही वेंचणूक लढपाचो विचार केल्ल्याचें ग्रेफॅन्स हांणी सांगलें.

गोवा फॉरवर्डचे वांगडी पेले फर्नांडीस हांणी, हे वेंचणुकेंत पक्षा वतीन न्हय, जाल्यार अपक्ष उमेदवार उबो केला. पक्षा कडल्यान कांयच सुचवण्यो नाशिल्ल्याचें सांगून कितेंय सुचवण्यो आयल्यार ताचेर चर्चा करची अशें तांणी स्पश्ट केलें.

रॉयला हांणी, बाणावले जिल्हो पंचायत पोट वेंचणूक जावपाचें कारण म्हळ्यार जिल्हो पंचायत वांगड्यान जातीचें फटीचें प्रमाणपत्र दिल्लें. ताचेर आक्षेप घेवन आपणें याचिका दाखल केली आनी तो अपात्र थारला. जिल्हो पंचायत वेंचणूक हें पंचायतराज कायद्या प्रमाणा जाता आनी हातूंतय इंडि आघाडी कायम दवरली. बाणावले भाजप उमेदवार ना. अशें आसूनय कोणाक कुशीक काडपाचो यत्न जाता. कॉँग्रेसीचे गट समितीनूय दोन नांवां जिल्हाक समितीक धाडली आनी तांणी प्रदेश समितीकडेन धाडली. मात कॉँग्रेसीन आघाडी वांगडा रावपाचो निर्णय घेतलो. ताका लागून काँग्रेस पक्ष सोडत अपक्ष वेंचणूक लढोवपाचो निर्णय घेतलो. आघाडी करतना थळाव्यांक विस्वासांत घेवंक ना आनी हे वेंचणुकेंत आघाडी करून गांवागांवा मदीं फूट घलची न्हय. हें राज्यभर जातलें अशी शिटकावणी रॉयला हांणी दिली. काँग्रेस पक्ष जरी सोडलो तरी पक्ष आपल्या मनांत आसा अशें तिणें म्हणलें.