भांगरभूंय | प्रतिनिधी
कॉंग्रेसीक जो सल्लो दिवपाचो तो दिला
मडगांव, प्रतिनिधी : फातोर्डा मतदारसंघांत खासदार सार्दीन हांणी एका पयशाचो निधी दिवंक ना. कॉंग्रेस आनी गोवा फाॅरवर्डचे युतीक विरोध करपी सार्दीनूच. तशेंच कॉंग्रेस पक्षाक मतां घालचीं न्हय हें सांगपी सार्दीनूच. ताचो व्हिडिओय आसा. कॉंग्रेसीक जो सल्लो दिवपाचो तो दिलो. आतां निर्णय कॉंग्रेसीन घेवचो. सार्दीन हांकां उमेदवारी दिले उपरांत ताचे फुडली भुमिका जाहीर करतलों, अशें गोवा फाॅरवर्डचे अध्यक्ष विजय सरदेसाय हांणी सांगलें.
आगळी, फातोर्डा २५ लाखांच्या कामांची सुरवात आमदार विजय सरदेसाय हांचे हाजेरींत जालो. ह्या वेळार सरदेसाय हांणी, फातोर्डा मतदारसंघांत रस्त्यांचीं कामां जाल्ल्यान आतां घाणयार्या उदकाचीं पायपां आनी राखणे वणटीचीं कामां चालू आसात.
वेंचणुकेची आचारसंहिता केन्नाय लागूं येता. ताका लागून ज्या कामांच्यो निविदा जारी जावन वर्क ऑर्डर काडल्यात, तीं कामां सुरू केल्यांत. फातोर्डाचे शेतजमिनीच्या बांयक सोलर पंप बसयतले. शेतकारांक गरजेच्यो सुविधा उपलब्ध करून दिवपाचो यत्न करतले. मडगांव पालिका एकाय कामाची निविदा काडिना म्हणून खुबश्या प्रभागांतलीं कामां उरल्यांत. ताका लागून त्या प्रभागांतल्या कामांचेर लक्ष दितले, अशेंय सांगलें.
कॉंग्रेसीचे प्रभारी माणिकराव ठाकरे हांची भेट घेवन चर्चा केल्या. ते बसकेक आपूण वचूंक ना. आतां कॉंग्रेसीन चर्चे खातीर आपयल्ल्यान गेलों आनी जें सांगपाचें आसलें तें सांगलें. सार्दीन वा हेर कोणायचें उलोवन कांयच फायदो ना. लोकसभा वेंचणुकेक उमेदवार कॉंग्रेस दितले. जिकल्यार ते जिकतले. तांकां उमेदवारी जाय तांका दिवं. तांकां जो सल्लो दिवपाचो तो दिला. फुडलो निर्णय कॉंग्रेसीन घेवचो. ताका जाय त्या उमेदवाराक तिकेट दिवची. तांणी सार्दीन हाका तिकेट दिल्यार फुडली भुमिका जाहीर करतलों, अशें सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
