भांगरभूंय | प्रतिनिधी
वाळपय ः केरी सत्तरी हांगा 8 ते 10 गवें भोंवतना थळाव्या लोकांच्या नदरेक आयले. हांगा जायते लोक शेती करतात. ते बरोबर केळी, सुपारी, माड, भाजी अशें ल्हान व्हड वेवसाय करतात. पूण रानवटी जनावरां तांचे लुकसाण करतात. हाका लागून थळाव्या शेतकारांनी हुस्को उक्तायलां.
गादो वाडो केरी सत्तरी हांगा आयज सकाळीं 8 ते 10 गवें भोंवतना दिसलें. हे गवे शेतीची नासाडी करुन शेतकारांक व्हड लुकसाण करतात. ते भायर माकड, वाग अशी हेर जनवरांय ह्या वाठारांत भोंवतना लोकांक दिसून आयल्यांत. पाळीव सुण्यांचेर हल्ले लेगीत ह्या रानवटी जनावरांनी हांचे आदीं केल्यात.
केरी सत्तरी हांगा शेतकी आनी बागायतीची रानवटी जनावरां लुकसाण करतात हो नवो विशय न्हय. पूण कितल्याशाच वर्सां सावन हाचेर ठोस उपाय सोदून काडपाक रानां खात्याक पुरायपणान येस मेळूंक ना. देखून शेतकार आनी बागायती आयज लेगीत आपलो जीव हातांत घेवन ह्या वाठारांत रावतात. केन्ना गवें, केन्ना रानदुकर आनी तर केन्ना माकड ह्या शेतकारांचे व्हड लुकसाण करतात.
केन्ना रातचें रस्तार भोंवतना हाका लागून गाडी चलोवपी आनी थळाव्या लोकां मदीं भंय निर्माण जाला. रानां खात्यान हाचेर लक्ष दिवन कांय उपाय सोदून काडचो अशी मागणी थळावे लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
