भांगरभूंय | प्रतिनिधी
म्हापशें, प्रतिनिधी ः लांच प्रकरणांत भ्रष्टाचार विरोधी पंगडान (एसीबी) तेरेखोल दर्यादेग पुलीस स्टेशनाचे आदले पुलीस निरीक्षक विद्धेश पिळगांवकार हाका अटक केली. हाचे पयलीं हवालदार संजय तळकार आनी उदयराज उर्फ राजू कळंगुटकार हांकांय अटक जाल्या.
ह्या प्रकरणा विशीं एसीबीकडेन पृथ्वी एच. एन. हांणी कागाळ केल्ली. कागाळदार पृथ्वी एच. एन. केरी दर्यादेगेवेल्या वाठारांत पॅराग्लायडिंग वेवसाय करता. हो वेवसाय चलोवपा खातीर तांचे कडेन गरजेचो परवानो ना असो दावो करून जानेवारी 2024 वर्सा आपल्या कडेन म्हयन्याक 10 हजार रुपया लांच मागपाची मागणी तेरेखोल दर्यादेगेवेल्या पुलीस स्टेशनाचे हवालदार संजय तळकार हांणी केल्ली असो आरोप तांणी कागाळींत केल्लो.
इतलेंच न्हय तर फुडें संबंदीत पुलीस अधिकाऱ्याच्या मध्यस्थीक लागून ह्या लांचची रक्कम म्हयन्याक 8 हजार रुपया थारायली. कागाळदारान ऑनलायन अॅपा वरवीं ही 8 हजार रुपया लांच दिली.
मजगतीं, 22 मार्चाक दुबावीत पुलिसांनी कागाळदाराचेर फट आरोप करुन गुन्यांव नोंद केलो. ताचे पॅराग्लायडिंग सामान जप्त केले. पूण हे संबंदी योग्य कागदपत्रां नाशिल्ल्यान ही कारवाय करपाचो नाटक केल्ल्याच्या दाव्या सयत कागाळदारान कागाळींत एसीबी कडेन पुरावे सादर केले. ते प्रमाण एसीबीन भ्रश्टाचार प्रतिबंध कायद्याच्या कलम 7 खाला गुन्यांव नोंद करून दुबावीत हवालदार संजय तळकाराची चवकशी केली. तशेंच पुलीस खात्यान पुलीस निरिक्षक विध्देश पिलगांवकाराची रोखडीच जीआरपींत बदली केली.
गुन्यांव नोंद जाल्ल्यान 7 एप्रीलाक पुलीस खात्यान तळकार हाका सेवेंतल्यान निलंबीत केलो. ह्या प्रकरणांत अटक जावची न्हय म्हणून ताणें दाखल केल्लो अटकपुर्व जामीन अर्ज उत्तर गोंय जिल्हो आनी सत्र न्यायालयांन 12 एप्रीलाक न्हयकारलो आनी त्याच दिसा एसीबीन ताका अटक केली.
ते उपरांत ह्या प्रकरणांत आरोपी आशिल्लो दुसरो दुबावीत पुलीस हवालदार उदयराज उर्फ राजू कळंगुटकार हाकाय 15 एप्रीलाक एसीबीन अटक केली. देखून पुलीस खात्यान ताकाय सेवेंतल्यान निलंबीत केलो. सध्या दोगूय दुबावीत पुलिस बंदखणीत आसात आनी तांचे जामीन अर्जाचेर सोमारा ता. 22 दीसा न्यायालयात सुनावणी जातली.
मजगतीं, वयल्या दोन दुबावितांची चवकशींतल्यान पुलीस निरिक्षक विध्देश पिळगांवकाराचोय ह्या लांच प्रकरणांत संबंद आसा हे उक्ते जाले. देखून एसीबीन शेनवारा 20 तारखेक पिळगांवकाराक अटक केली.
मजगतीं, एसीबीन लांच प्रकरणांत अटक केल्लो पुलीस निरिक्षक विध्देश पिळगांवकार कांय दिसांनी पर्यटना खातीर परदेशांत वचपाचो आशिल्लो. कॅनडाक वचचे पयलींच ताका अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
