भांगरभूंय | प्रतिनिधी
भांगरभूंय । प्रतिनिधी
वाळपयः गोंय- कर्नाटक मजगतींच्या चोर्ला घाट रस्त्यार केरी हांगा अबकारी खात्याच्या चेक पोस्टार अंधाधूंद कारबार चलता अश्यो ज्यो कागाळी करतांत तातूंत तथ्य आशिल्ल्याचें निमणे सामकार आयलें. ह्या चेक पोस्टांतल्या सुमार 36 लाख रपया मोलाचो बेकायदेशीर सोरो घेवंन वचपी ट्रकाक वचपाक दिलें. मात गोंय सरकाराच्या गुन्यांव अन्वेशण विभागाच्या पंगडान ह्या ट्रकाचो माग घेवन कर्नाटक हद्दींत चोर्ला हांका ताची तपासणी करून तो आनी तातूंत आशिल्लो सोरो जप्त केले.
केरीच्या अबकारी चेक पोस्टांर आशिल्ल्यांच्या आशिर्वादान कर्नाटकांत व्हडा प्रमाणांत सोऱ्याची बेकायदेशीर येरादारी चलता अश्यो कागाळी आशिल्ल्यो. मडगांवच्यान 36 लाख रुपया मोलाचो सोरो घेवन वचपी ट्रक ह्या चेक पोस्टांतल्यान कसलीय तपासणी जायनासतना फुडें गेलो. सेगीत 24 वरां ह्या पोस्टांतल्या वचपी वाहनांची तपासणी जाता अशें सांगतात तरीय इतल्या व्हडा प्रमाणांत सोरो घेवन वचपी ट्रक अबकारी कर्मचाऱ्यांचे नदरेंत कसो आयलो ना व्हो प्रस्न उप्राससला. हाका लागून कर्मचाऱ्यांच्या प्रामाणिकपणा विशीं दुबाव तयार जाला. ह्या चेक पोस्टाची जापसालदारी अबकारी खात्याच्या वाळपय कार्यालया कडेन आसा. ट्रक चेक पोस्टांतल्या गेलो तेन्ना कामार आशिल्ल्यांचेर कारवाय जावपाची आतां शक्यताय आसा. हे कर्मचारी प्रवासी गाड्यांची कडक तपासणी करतात आनी अवजड वाहनां कडेन आडनदर करतात अशी प्रवाश्यांची कागाळ आसा.
मेळिल्ले म्हायती प्रमाण मडगांवच्यान सोरो घेवन चोर्ला घाटांतल्यान एक ट्रक बेळगांवां वतलो अशी म्हायती गुन्यांव अन्वेशण विभागाक तांच्या खबऱ्यां वरवीं मेळल्ली. ताणी दुबावीत ट्रकाचो फाटलाव करून चोर्ला वाठारांत तो आडायलो . रस्त्यार ट्रकाचो माग काडपाक साद्या कपड्यांतल्या पुलिसांक दवोरल्लें. ह्या ट्रकांत वेगवेगळ्या सोऱ्याचो सुमार 72 हजार बाटल्यो आशिल्ल्यो. तांचें मोल सुमार 36 लाख रुपये आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
