भांगरभूंय | प्रतिनिधी
कोची (केरळ) : पिरावम गांवां लागीं न्हंयेंत आयतारा ७ वर्सां पिरायेच्या एका ल्हान चलयेची कूड मेळ्ळी. ही कूड मेळिल्ल्यान, आत्महत्या केल्ल्याचो दुबाव आशिल्ल्या एका कुटुंबांतल्या ४ जाणांच्या कुडींचो सोद सोंपलो.
पयलीं शुक्रार सांजवेळा, चलयेची आवय विजी (जी कुड्डी आशिल्ली) आनी तिचो २ वर्सांचो चलो हांच्यो कुडी न्हंयेंत मेळ्ळ्यो. उपरांत शेनवारा बापायची, नारायणन हाची कूड मेळ्ळी जाल्यार चलयेचो सोद आयतारा सकाळ मेरेन सुरू आशिल्लो.
पुलिसांनी केल्ल्या तपासा प्रमाण, विजी आनी तिचो चलो कोठमंगलम हांगा भाड्याच्या घरांत रावताले. नारायणन, जो मुळचो पालक्कडचो, तो आपल्या कुटुंबा वांगडा थंय रावतालो.
अधिकारी आनी पुलिसांचे म्हायती प्रमाण, घराचें भाडें भरपाक जम नाशिल्ल्यान नारायणन आनी ताच्या कुटुंबान कांय दिसां आदीं पुलिसां कडेन अर्थीक आदार मागिल्लो. पुलिसांनी तांकां रावपाक वेगळी वेवस्था केल्ली. हें कुटूंब आयतारा थंय स्थलांतर करपाचें आशिल्लें. तपासांत पुलिसांक पिरावम हांगाच्या एका हॉटेलांतली सीसीटीव्ही फुटेज मेळ्ळा, जातूंत हें कुटूंब बिरेस्तारा जेवतना दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
