भांगरभूंय | प्रतिनिधी
बाणावले आप कार्यकर्त्यांनी केजरीवालांच्या अटके आड केलीं निदर्शनां
मडगांव, प्रतिनिधी : आपचे अध्यक्ष तशेंच दिल्लीचे मुख्यमंत्री अरविंद केजरीवाल हांणी उदरगतीच्या कामांचेर राजकारण केलें. दुस्वासाचें, धर्मीक फुटीच्या राजकारणाक कुशीक उडयलें. राजकारणांतलो हो बदल देशाक आवडला. देशांत बदल हाडप्यांचो भाजपाक थर्त भंय दिसता, हें कळून आयलां. केजरीवाल हांणी दाखयिल्ल्या उदरगतीच्या कामांचे वाटेर सदांच चलतलों, अशें आमदार व्हेंझी व्हिएगस हांणी सांगलें.
बाणावलेच्या आम आदमी पक्षाच्या कार्यालया भायर आपच्या कार्यकर्त्यांनी एकठांय येवन केजरीवाल हांकां ईडीन केल्ले अटकेचो निशेध केलो. आमदार व्हिएगस हांणी सांगलें, देशाच्या इतिहासांत कार्यरत मुख्यमंत्र्यांक केन्ना अटक जावंक नाशिल्ली. मात तें काम भाजपा सरकारान केलें. हातूंतल्यान भाजपान तांकां केजरीवाल हांचो भंय दिसता हें दाखोवन दिलां. मात केजरीवाल हो एक विचार आशिल्ल्यान आपचे कार्यकर्ते आनी नागरीक तो मनांतल्यान केन्नाच काडपाक शकनात. सोरो विक्री घोटाळो जाल्यार योग्य तपास करिनासतना मनिष सिसोदिया, सत्येंद्र जैन, विजय नायर आनी आतां केजरीवाल हांकां अटक केली. केजरीवाल हांणी शिक्षण, भलायकी आनी समाजीक उदरगतींत बदल हाडलो, राजकारणाची व्याख्या बदल्ली. केजरीवाल हांणी दिल्ले विचार गोंयांतूच न्हय देशभरांत पातळ्ळ्यात. ताका लागून देशभरांत केजरीवाल निर्माण जाल्यात. केजरीवाल हांचे अटकेचो निशेध करीत गोंय आनी गोंयकारांचे उदरगती खातीर काम करतलों अशें आमदार व्हेंझी हांणी सांगलें.
विरोधी पक्षाच्या फुडार्यांक अटक करून भाजपाचें सरकार राजकारणांत नव्यान येवपी आनी बदल घडोवंक पळोवपी तरणाट्यां मदीं भंय निर्माण करपाचो यत्न करता. मात गोंयची जनता भाजपा आड मतदान करून ह्या चेंपणाक जाप दितली. सरकारा आड उलोवपी, चुकीच्या गजालींचेर बोट दवरप्यांक भाजप सरकारान बंदखणींत घालपाचे धोरण स्विकारलां. भाजप धर्मां मदीं फूट घालून मतांची झोळी भरपाचें काम करता. लोकां मदीं फूट घालून देश चलोवपाचो आनी हुकूमशाय हाडपाचो प्रकार भाजपान सुरू केला. कांय दिसांनी, म्हयन्यांनी आनीकूय फुडार्यांक आनी लोकांकूय बंदखणींत घालतले. ताका लागून वेळार शिटूक जावन लोकांनी निर्णय घेवचो अशें तांणी सांगलें.
आपच्या फुडार्यांक आनी दिल्लीच्या मुख्यमंत्र्यांक अटक करून भाजपा आपाक कितली भियेता हें दाखोवन दिलां. भाजपा भायल्यान जिखतले अशें दाखयता मात भितरल्यान बरेंच भियेल्यात, अशें व्हेंझी हांणी सांगलें.
ईडी, सीबीआय वा हेर एजन्सी फकत विरोधकांकूच लक्ष्य कित्याक करता हें लोकांक आतां कळपाक लागलां. ताका लागून लोकांनी जागृत जावन मतदान करपाची गरज आसा. गुन्यांवकारांक अटक करपाक सांगल्यार ताका पुराव्यांची गरज आसता. मात ईडी, सीबीआयचो वापर करून भाजप सरकार विरोधकांक बंदखणींत उडयता, अशीं मतां ह्या वेळार हाजीर आशिल्ल्या कांय वावुरप्यांनी ह्या प्रतिनिधी कडेन उक्तायलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
