भांगरभूंय | प्रतिनिधी
पणजीः अरविंद केजरीवाल हांचे आड सोरो भानगड केस सध्या उच्च न्यायालयांत प्रलंबीत आसा. हे सुनावणींत न्यायाधीश स्वर्णकांत शर्मा हांणी ह्या प्रकरणाचें काम पळोवचें न्हय अशी याचिका आमी दाखल केल्ली. पूण ती न्हयकारली. ह्या प्रकरणाचो निमाणो निकाल अजून जाहीर जावंक ना. अशें आसून लेगीत केजरीवाल दोशी आसा अशें सांगून भाजपाचे फुडारी लोकांची दिशाभूल करतात. मुळांतूच दादागिरी करपाक भाजपूच हुशार आसा अशी टिका ‘आप’चे प्रदेशाध्यक्ष वाल्मीकी नायक हांणी केल्या. बुधवारा पणजेंत आयोजीत केल्ले पत्रकार परिशदेंत ते उलयताले.
नायक हांणी सांगलें, हाचे आदीं कनिश्ठ न्यायालयान केजरीवाल आनी हेर आप फुडाऱ्यां आड केस नोंद करपाक न्हयकार दिल्लो. न्यायालयान 600 पानांच्या निकालांत सीबीआय अधिकाऱ्यांक जापसालदार धरिल्ले. सध्या ही केस उच्च न्यायालयांत पावल्या. ह्या प्रकरणांतलो न्यायाधीश स्वर्णकांत शर्मा हांचे दोन पूत वकील आसात आनी ते केजरीवाला आड केस झुजपी सरकारी वकिलां कडेन काम करतात. अशे परिस्थितींत न्यायाधीश शर्मा हांणी ही केस हाताळची न्हय अशी याचिका आमी दाखल केल्ली. पूण ही याचिका तांणी न्हयकारली आनी आतां तेच ह्या केसीचे काम स्वता पळयतले.
पूण ह्या प्रकरणांत न्यायाची प्रक्रिया नेमा प्रमाण चालू उरतली. आमदार दाजी साळकार हांणी केजरीवाल हांचे विशीं वापरिल्ल्या उतरांचो आमी निशेध करतात. कायद्या आड वागप आनी दादागिरी करपाक भाजप हुशार आसा. भाजपा सदांच न्यायाचे प्रक्रियेचेर प्रभाव घालपाचो यत्न करता आनी निकाल आपले वटेन लागलो ना जाल्यार नाटकां सुरू करता असो आरोप वाल्मिकी नायक हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
