भांगरभूंय | प्रतिनिधी
स्वयंपूर्ण गोंय मोहीमे खाला कार्यावळ
पणजी, प्रतिनिधीः स्वयंपूर्ण गोंय कार्यावळी खाला केंद्रीय शेतकी मंत्री शिवराजसिंह चौहान हे वर्चुअल पद्दतीन शेनवारा 31 तारखेक गोंयचे शेतकार आनी स्वयंपूर्ण इश्टांक मार्गदर्शन करतले. शेतकार, सरपंच तशेंच सरकारी अधिकारी ह्या कार्यावळीत वांटेकार जातलें.
मुख्यमंत्री डॉ. प्रमोद सावंत हांणी पत्रकार परिशदेत ही म्हायती दिली. ह्या वेळार शेतकी खात्याचे संचालक संदीप फळदेसाय, नियोजन आनी सांख्यिकी संचालक विजय सक्सेना आनी हेर अधिकारी हाजीर आशिल्ले.
दुद, फळां, भाजयो हांतूत गोंय स्वयंपूर्ण जावचे म्हूण गोंय सरकारान स्वयंपूर्ण गोंय मोहीम सुरू केल्या. हाचे पयली प्रधानमंत्री नरेंद्र मोदी हांणी स्वयंपूर्ण मित्र तशेंच हेर घटकां कडेन संवाद सादला. हेच पद्दतीन शेनवारा सकाळीं 11 वरांचेर चौहान हे शेतकारांक मार्गदर्शन करतले. पंचायती, विभागी कार्यालयां, रवींद्र भवन मेळून 213 थळांचेर स्क्रीनीचेर कार्यावळ प्रसारीत जातली. ते वेळार हांव रवींद्र भवन, सांखळे हाजीर आसतलों, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
