भांगरभूंय | प्रतिनिधी
पणजी: गोंयांत कोरोनाचे सक्रीय दुयेंती परतून वाडूंक लागल्यात. लोकांनीय आतां कोरोना बुस्टर डोस घेवप उणें केलां. 18 ते 59 पिराये गटांतले फक्त 7 टक्के लोकांनी बुस्टर डोस घेतला. जाल्यार 60 वर्सां पिराये वयल्या 53 टक्के लोकांनी बुस्टर डोस घेतला. सद्या आनीक पांच हजार बुस्टर डोसा खातीर केंद्रा कडेन मागणी केल्ल्याचें वासिनीकरण मुखेली डॉ. उत्तम देसाय हांणी सांगलें.
वासिनीकरण मोहिमेच्या पयल्या आनी दुसऱ्या डोसाक लोकांचो बरो प्रतिसाद मेळ्ळो, पूण बुस्टर डोसा कडेन लोकांनी पुरायपणान फाट घुंवडायल्या. भलायकी खात्या कडल्यान वेळावेळार प्रचार करून लेगीत लोकांनी ह्या डोसाक बरो प्रतिसाद दिल्लो ना. ज्या लोकांक विदेशांत वचपाचें आसा अशा कांय मेजक्याच लोकांनी बुस्टर डोस घेतला. पूण आतां सांगून लेगीत लोक बुस्टर डोसाक प्रतिसाद दिनात अशें डॉ. उत्तम देसाय हांणी सांगलें.
सद्या गोंयांत बुस्टर डोस उपलब्ध नाशिल्ल्यान वासिनीकरण मोहीम बंद आसा. केंद्रा कडेन आनीक 5 हजार बुस्टर डोसाची मागणी केल्या आनी ते डोस मेळ्ळे उपरांत परतून वासिनीकरण मोहीम सुरू करतले. लोकांनी लेगीत हाका बरो प्रतिसाद दिवचो. कांय लोक वासिनीकरणाचो अपप्रचार करीत आशिल्ल्यान लोकूय डोस घेवपाक मुखार येनात. आमी लोकांक आवाहन करून डोस दिवपाचो यत्न करतात अशेंय डॉ. उत्तम देसाय हांणी म्हणलें.
सद्या गोंयांत कोरोना सक्रीय दुयेंतींची संख्या वाडत आसली तरी भियेवन वचपाची गरज ना. सद्या व्हायरल थंडी आशिल्ल्यान सक्रीय दुयेंती वाडत आसात. पूण खूबशा जाणांनी दोनूय डोस पुराय केल्यात. ताका लागून सद्या तरी कोरोनाची कसलीच भिरांत नाशिल्ल्याचें डॉ. देसाय हांणी ह्या वेळार स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
