भांगरभूंय | प्रतिनिधी
मडगांव, प्रतिनिधी : कॉंग्रेसचे लोकसभा उमेदवार कॅ. विरियातो फर्नांडीस हांचो फकांडां केल्लो ऑडिओ सेव्ह गोवा हे फेसबुक पेजीर घाला. हे विशीं गोंय कॉंग्रेस उपाध्यक्ष सुनील कंवठणकार हांणी केल्ले कागाळी प्रमाण फेसबूक पेजीच्या अनवळखी ऍडमिना आड गुन्यांव नोंद केला.
गोंय प्रदेश कॉंग्रेसीचे उपाध्यक्ष सुनील कंवठणकार हांणी फातोड्डें पुलीस स्टेशनाचेर ह्या प्रकरणाची कागाळ नोंद केल्या. ५ मे दिसा ‘सेव्ह गोवा’ हे पेजीचेर कॉंग्रेसीचे दक्षीण गोंय लोकसभा उमेदवार कॅ. विरियातो हांचो एक ऑडिओ अपलोड केला. ह्या ऑडिओंतलो आवाज कॅ. विरियातो फर्नांडीस हांचो न्हय. कॅ. विरियातो हांचो नाशिल्लो ऑडिओ तांचो आशिल्ल्याचें सांगून चुकीची म्हायती पातळ्ळ्या. ह्या प्रकरणांत कंवठणकार हांणी केल्ले कागाळी प्रमाण, पुलिसांनी फटींगपणा केल्लयाचो गुन्यांव सेव्ह गोवा हे पेजीच्या अनवळखी ऍडमिना आड नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
