भांगरभूंय | प्रतिनिधी
पणजी, बातमीदार ः काँग्रेसीचे दक्षीण गोंयचे उमेदवार कॅ. विरिएतो फर्नांडीस हांचे कडेन 1 कोटी 95 लाख रुपयांची मालमत्ता आसा. जाल्यार तांची घरकान्न अनिता कडेन 3 कोटी 31 लाख रुपयांची मालमत्ता आसा. दोगांयचीय मेळून सुमार 5.30 कोटी रुपयांची मालमत्ता आसा. ही म्हायती विरिएतो हांणी वेंचणूक आयोगाक दिल्ल्या प्रतिज्ञापत्रांतल्यान मेळ्ळ्या. तांणी दक्षीण गोंय जिल्होधिकाऱ्यां कडेन बुधवारा उमेदवारी अर्ज सादर केलो.
प्रतिज्ञापत्रा प्रमाण विरिएतो हांचेर एक लाख 89 हजार रुपयांचें रिण आसा. तांच्या नांवार शेतवडीची जमीन तशेंच वेपारी इमारत ना. तांच्या फ्लॅट, जमनी सारकिल्ल्या स्थावर मालमत्तेचें मोल सुमार 1 कोटी 23 लाख रुपया आसा. तांचे घरकान्ना कडेन वट्ट 50 लाख रुपयांची स्थावर मालमत्ता आसा. विरिएतो आनी तांचे घरकान्न कडेन सुमार 24.50 लाखांच्यो वट्ट चार चाकी गाडयो आसात. अनिता कडेन 15 लाख रुपया मोलाचें भांगर आसा. जाल्यार विरिएतो कडेन 4 लाख 32 रुपया मोलाचें भांगर आसा.
विरिएतो कडेन 38 हजार रुपया आनी ताच्या घरकान्न कडेन 41 हजार रुपया रोख आसात. विरिएतोच्या वेगवेगळ्या बँक खात्यांत वट्ट 1 लाख 62 हजार रुपया आसात. जाल्यार ताची घरकान्न अनिताच्या बँक खात्यांत 37 लाख 39 हजार रुपया आसात. विरिएतो हांणी म्युच्युअल फंडांत सुमार 57 लाख रुपया गुंतवणूक केल्या. जाल्यार अनिता हिणें शेअर बाजारांत आनी म्युच्युअल फंडांत 2 कोटी 7 लाख रुपया गुंतयल्यात.
विरिएतो हांणी गोंय विद्यापिठांतल्यान अभियांत्रिकी पदवी घेतल्या. ते उपरांत ताणें नेव्हीच्या आयएनएस शिवाजी, लोणावळा हांगाच्यान मरीन इंजिनियरिंग केलां. ते उपरांत ताणें नेव्हीच्या एनआयएटींतल्यान एअर इंजिनियरिंगांत स्पेशलायझेशन केला. तांचे आड मायणा कुडटरी पुलीस स्टेशनांत एफआयआर नोंद आसा. हे संबंदी मडगांवच्या न्यायालयांत खटलो सुरु आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
