भांगरभूंय | प्रतिनिधी
पील, खबरां संस्था: नेटफ्लिक्साचेर ‘मनी हायस्ट’ ही वेब मालिका खूब लोकप्रिय जाल्ली. आयज लेगीत हे वेबमाळेचे जायते फॅन आसात. संवसारभर व्हडल्यो चोरयो जाता तेन्ना ताची तुळा ‘मनी हायस्ट’ कडेन करतात. अशीच एक चोरी कॅनडांत जाल्ल्याचें उक्ताडार आयलां. कॅनडाचे पील प्रातांतले पुलीस मुखेली निशाण दुरायअप्पा हांणी सांगलें, ही चोरी बरीच व्हडली आसा. देखून आमी फकांडांनी तिची तुळा नेटफ्लिक्साचेर आशिल्ले एके सिरीज कडेन केल्या. तशेंच कॅनडांतली ही सगळ्यांत व्हडली चोरी.
ह्या चोरये प्रकरणांत णव जाणांक अटक केल्या. हातूंत कांय भारतीय नागरिकांचोय आस्पाव जाता. एप्रील २०२३ वर्सा झुरिच स्वित्झर्लंडांतल्यान भांगरान भरिल्लो कार्गो कंटेनर टोरंटोच्या पिअर्सन आंतरराष्ट्रीय विमानतळार देंवयल्लो. चोरांनी एअर कॅनडाच्या दोन कर्मचार्यांक लागीं धरून ही चोरी केल्ली. ह्या म्हालांत ६,६०० भांगराच्यो बिस्कुट्यो आशिल्ल्यो. जांचें वजन ४०० किल आनी मोल २ कोटी डॉलर अशें आशिल्लें. तशेंच ह्या म्हालांत २५ लाख मोलाचें परकी चलनय आशिल्लें.
१७ एप्रील २०२३ दिसा झुरिच सावन विमान दनपरां ३:५६ वरांचेर विमानतळार देंवलें. थोड्याच वेळान भांगरान भरिल्लो कंटेनर विमानतळाच्या गुदावांत व्हेलो अशें पुलीस अधिकार्यांनी सांगलें. ते उपरांत गुदावांतल्यान उल्लेख केल्लो कंटेनर चोरयेक गेलो. पिअर्सन विमानतळार खर सुरक्षा आसून लेगीत खूब हुशारकायेन हो कंटेनर चोरलो. ताका लागून हे चोरयेची तुळा ‘मनी हायस्ट’ हे वेब मालिके कडेन केल्ली.
१८ एप्रील २०२३ दिसा कॅनडा पुलिसांनी हे चोरयेची दखल घेवन तपास सुरू केलो. तपास चालू आसतना पुलिसांनी अमेरिकेच्या सोरो, तंबाखू, शस्त्र आनी स्फोट विरोधी पंगडांचीय मजत घेतली. वर्सभर ह्या प्रकरणाचो तपास केले उपरांत कॅनडाच्या पुलिसांनी आतां णव आरोपींक अटक केल्या. जातूंत कांय भारतीय वंशाच्या नागरिकांचो आसपाव आसा. परमपाल सिद्धू, अमित जलोटा, अम्मद चौधरी, अली रझा, प्रसाद परमलिंगम, सिमरन प्रित पानेसर, अरचित ग्रोव्हर आनी अर्सलन चौधरी हांचो हे चोरयेंत आसपाव आसा. हांतलो परमपाल सिद्धू (५४ ) हो एअर कॅनडाचो कर्मचारी. चोरयेचो गुन्यांव घडोवन हाडपाक षडयंत्र रचिल्ल्याचो गुन्यांव ताचेर दवरला. अमित जलोटा, सिमरन प्रित पानेसर हे तिगूय एअर कॅनडाचे आदले कर्मचारी.
हे चोरयेंतलें चोरी केल्लें भांगर वितळावन विकलें. तांतुंतल्यान मेळिल्ल्या पयशांनी तांणी शास्त्रं विकत घेतलीं. पुलिसांनी आतां मेरेन तांचे कडल्यान ६५ बंदुको जप्त केल्यात. तशेंच आनीकूय शस्त्रां आसपाचो दुबाव आशिल्ल्यान ह्या प्रकरणाचो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
