भांगरभूंय | प्रतिनिधी
खबरां संस्था
नवी दिल्लीः फाटल्या ईकरा म्हयन्यां सावन वादाच्या घेऱ्यांत आशिल्ल्या कुस्ती म्हासंघाची नवनिर्वाचीच कार्यकारिणी खेळा मंत्रालयान आयताराक बरखास्त केली. तीन दिसां पयलीं 21 डिसेंबराक कुस्ती म्हासंघाची वेंचणूक जाल्ली आनी म्हासंघाचो आदलो वादग्रस्त अध्यक्ष तशेच भाजपा खासदार बृजभूषण शरण सिंह हाच्या संजय सिंह ह्या लागींच्याक म्हासंघाचो अध्यक्ष केल्लो. 28 डिसेंबराक नवे कार्यकारिणी समितीन बृजभूषण हाच्या उत्तर प्रदेशांतल्या गोंडा ह्या लोकसभा मतदारसंघांत ज्युनियर राष्ट्रीय चॅम्पियनशीप घेवपाची घोशणा केल्ली. बृजभूषणाचेर बायल कुस्तिगिरांनी लिंगीच शोशणाचो आरोप केल्ले. खेळा मंत्रालयान बरखास्तीची कारवाय करपा फाटल्यान हें एक कारण आसा.
खेळा मंत्रालयाच्या ह्या निर्णयाक साक्षी मलिक, गीत फोगट हाणी येवकार दिला. संजय सिंह हाका कुस्ती म्हासंघाचो अध्यक्ष केल्ल्यान ऑलिम्पीक पदक जिखपी साक्षी मलिकान कुस्तींतल्यान संन्याश घेवपाची घोशणा केल्ली. पहिलवान बजरंग पुनियान आपलो पद्मश्री पुरस्कार सरकाराक परत दिल्लो. गूंगा पहिलवान हाणेय पद्मश्री परत दिवपाचें जाहीर केल्लें. साक्षी मलिकाची आवय कृष्णा मलिकान खेळां मंत्रालयाच्या निर्णयाचेर खोशी उक्तायल्या आनी आपली चली साक्षी कुस्तींतल्यान संन्याय घेवपाच्या निर्णयाचो फेर विचार करतली अशे सांगला. पंतप्रधान नरेंद्र मोदीच्या घरा भायर फुटपाथाचेर दवोरून आयिल्ल्या बजरंग पुनियान व्हो पुरस्कार मानान परत हाडटलो अशें सांगलां.
कुस्ती म्हासंघाच्या पयलींच्या कार्यकारिणीचो बृजभूषण अध्यक्ष आनी संजय सिंह जोड सचीव आशिल्लो. संजय सिंग राष्ट्रकूल चॅम्पियन अनिता सिंह श्योराणाक हारोवन कुस्ती म्हासंघाचो अध्यक्ष जाल्लो. संजय सिंह हाच्या जैता उपरांत बृजभूषण सिंगाच्या चलो प्रतीक भूषण सिंगान कुस्ती म्हासंघाचेर आमचो अजून दबदबो आसा अशें सांगल्लें.
म्हाका कांय सांगपाचें ना
कुस्ती म्हासंघाची कार्यकारिणी बरखास्त करपाच्या खेळां मंत्रालयाच्या निर्णयाचेर आपल्याक कांय सांगपाचें ना. खेळां मंत्रालयान म्हाका कसलीच म्हायती दिली ना अशें बृजभूषण हाणे सांगलें. सर्त आयोजीत करतना नेमाचें उल्लंघन केल्ले खातीर कार्यकारिणी खेळा मंत्रालयान बरखास्त केली अशें नवनियुक्त अध्यक्ष संजय सिंह हाकाय निलंबीत केलां अशें ताणे सांगलें. खेळां मंत्रालयाच्या निर्णयाचें म्हाका अजाप दिसलें. खेळा मंत्रालया कडेन आपूण वासपूस करतोलों अशें सांगलें.
संजय सिह कुस्ती म्हासंघाचो अध्यक्ष जाल्या उपरांत बृजभूषणा आड थरणे आंदोलन करपी कुस्तिगीर नाखोशी आशिल्ले. बिरेस्ताराक सांजं बजरंग पुनिया, साक्षी मलिका आनी विनेश फोगाट हाणी पत्रकार परिशदे घेतल्ली. तेन्ना साक्षी मलिकान कुस्ती सोडपाचो घोशणा केल्ली.
खेळां मंत्रालयान कुस्ती म्हासंघ बरखास्त केल्या उपरांत वेगवेगळ्यो प्रतिक्रिया सामकार येतात. गीता फोगाटान आपल्या ट्वीटर अकांवटाचेर कुस्तीगिरांक न्याय मेळटलो अशी आस्त उक्तायल्या. म्हासंघ बरखास्तीचो निर्णय घेवपाक कळाव जालो अशे ताणे म्हणलां. ही कारवाय हाचे पयलींच जावपाक जाय आशिल्ली अशें ऑलिम्पीक पदक जैतिवंत बॉक्सर विजेंदर सिंह हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
