भांगरभूंय | प्रतिनिधी
पणजीः उद्देग आनी शिक्षणीक संस्थां मदले परस्पर सहकार्य वाडोवपा खातीर विद्या प्रबोधिनी म्हाविद्यालय आनी गोंय चेंबर ऑफ कॉमर्स (जीसीसीआय) हांणी “ब्रिजिंग द गॅप: इंडस्ट्री-अकॅडेमिया इंटरफेसाक प्रोत्साहन दिवप” ह्या विशयाचेर एक दीसाचे राज्य पांवड्यावेली परिशद घडोवन हाडली. विद्या प्रबोधिनी महाविद्यालयाचे प्राचार्य भूषण भावे हांणी ही म्हायती दिली. बिरेस्तारा पणजेत जाल्ले पत्रकार परिशदेंत ते उलयताले. ह्या वेळार संस्थेचे अध्यक्ष संजय वालावलकार, जीसीसीआयचे संजय आमोणकार आनी डॉ. उज्ज्वला हणजुणकार हजर आशिल्ले.
ही परिशद 5 ऑक्टोबराक कला आनी संस्कृती भवनांत सकाळीं 9 ते 5 वरां मजगतीं जातली. हे परिशदेंत राज्यभरांतले शिक्षणीक संस्था आनी विद्यार्थी हाजीर आसतले. परिशदेंत सैद्धांतिक शिक्षण आनी उद्देगांत जाय आशिल्ल्या वेव्हारीक कुशळटायेचेर चर्चा जातली. हाका लागून विद्यार्थ्यांची रोजगार क्षमताय वाडोवप, सहकार्यान संशोधनाक प्रोत्साहन दिवप, स्टार्टअपांक चालना दिवप हाचेर भर दितले. कुशळ मनीसबळ विकसीत करपा खातीर हो उपक्रम मोलादीक थारतलो, अशें भावे हांणी सांगलें.
परिशदेंत शिक्षणीक मळावेले अभ्यासक, उद्देजक, धोरण निर्माते आनी विद्यार्थी एकठांय येवन शिक्षणीक आनी उद्देगां मदल्या सहकार्याच्या रणनितीचेर चर्चा करतले. परिशदेंत श्रीनिवास धेंपो, प्रा. हरिलाल मेनन, संजय आमोणकार, नितीन कुंक्कळेकार, ललित सारस्वत, विश्वास धुमे, सुनील भांड, डॉ. हरीप खानापुरी आनी हेर मानेस्तांचो आस्पाव आसा.
शिक्षकां खातीरय इंटर्नशिप
उद्देगांत कितें नवें आसा तें जाणून घेवपा खातीर शिक्षकांकय इंटर्नशिप करपाक सांगतले. अशें करपी गोंयांतलें हें पयलें म्हाविद्यालय. इंटर्नशिप केल्लया शिक्षकांच्या स्लल्या प्रमाण अभ्यासक्रमांत बदल करतले. तशेंच गरजेचें शिक्षण नाशिल्ल्या पूण एका मळार तज्ञ आशिल्ल्या लोकांचो आदार घेवपाचो आमी विचार करता अशें प्रा. भूषण भावे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
