भांगरभूंय | प्रतिनिधी
कुवेत, खबरां संस्था: दक्षीण कुवेतांतल्या मंगाफ शारांत आयज बुधवारा सकाळीं व्हड अपघात घडलो. हांगचे एके इमारतीक उजो लागून ४३ जाण हुलपून संवसाराक अंतरले. मरण आयिल्ल्या मदीं १० भारतीय नागरिकांचो आस्पाव आसा. ह्या भिरांकूळ उज्यांत ४० जाण वाटावले. तांकां उपचारा खातीर हॉस्पिटलांत दाखल केल्यात.
हे इमारतींत भारता सयत आशिया खंडांतले मजूर रावतात. ४१ मजुरांक मरण आयलां. तशेंच ४० जाण जखमी जाल्यात.
मेजर जनरल रशीद हमद हांणी सांगलें, थळाव्या वेळा प्रमाण सकाळच्या ६ वरांचेर आमकां हे घडणुकेची म्हायती मेळ्ळी. ही म्हायती आमी रोखडीच उजो पालोवपी दळा सयत संबंदीत अधिकार्यां मेरेन पावयली. ते उपरांत सोडवणूक काम सुरू जालें. रांदचे कुडींत उजो लागलो आनी कांय मिण्टां भितर उजो पुराय इमारतींत पातळ्ळो.
हेल्पलायन क्रमांक
हे घडणुके उपरांत कुवेतांतल्या भारतीय दूतावासानय हेल्पलायन क्रमांक जाहीर केला. क्रमांक +९६५-६५५०५२४६ असो आसा. संबंदीतांनी ह्या हेल्पलायन क्रमांकाचेर संपर्क करचो. तुमकां शक्य तितली मजत दिवपाक दुतावास कटिबद्ध आसा, अशें थळाव्या अधिकाऱ्यांनी सांगलें.
मजगतीं, कुवेतचे गृहमंत्री शेख फहद अल-युसूफ अल-सबाह हांणी इमारतीच्या धनयाक अटक करपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
