भांगरभूंय | प्रतिनिधी
फोंडें: शेनवारा पावस पडपाक सुरवात जाले उपरांत बेतोडें ते कुर्टी मेरेनच्या व्हाळांत उदकाचो रंग काळो जाल्लो दिश्टी पडलो. बेतोडें वाठारांतल्या उद्देगीक वसणुकेंतल्यान काळ्या रंगाचें दुशीत उदक सोडिल्ल्याचो दुबाव थळाव्या लोकांनी उक्तायला. व्हाळाची राखण करचे खातीर सरकारान गांभिर्यान लक्ष दिवचें, अशी मागणी थळाव्या लोकांनी केल्या.
फाटल्या कांय वर्सां सावन कुर्टीचो व्हाळ घातक रसायनांक लागून चर्चेंत येता. थळाव्या लोकांनी कागाळी केल्यो तरी लेगीत कसलीच कारवाय जायना. थळावे लोक फाटलीं 14 वर्सां प्रदुशण खात्या कडेन कागाळी करीत आसात. पूण दुशीत उदक सोडप्यांचेर अजून मेरेन कारवाय करपाचें धाडस करपाक सरकारी अधिकारी अपेशी थारल्यात.
शेनवारा पडिल्ल्या आडवेळ्या पावसाचो फायदो घेवन बेतोडें वाठारांतल्यान व्हाळांत काळ्या रंगाचें उदक सोडलें. ताका लागून व्हाळांतलें नुस्तें मरतलें, असो भंय थळावे लोक उक्तायतात. बेतोडें पंचायत वाठारांतल्या लोकांनी कितलेशेच खेपे थळावी पंचायत तशेंच प्रदुशण मंडळा कडेन सेगीत कागाळी केल्यात. पूण अजून मेरेन घातक रसायन सोडपाचे प्रकार बंद जावंक नात. व्हाळांत घातक रसायन सोडले उपरांत उदकाक घाण मारता, अश्यो कागाळी थळावे लोक करतात. बेतोडें पंचायती वतीन फाटल्या दोन- तीन वर्सां सावन परतून परतून प्रदुशण मंडळाक पत्र धाडून संयुक्त तरेन व्हाळाची पळोवणी करपाची मागणी करता. पूण प्रदुशण मंडळाचे अधिकारी अचकीत येवन व्हाळाची पळोवणी करून वतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
