भांगरभूंय | प्रतिनिधी
कुर्टी अपघात: इश्टाचें आयकनासतना भायर सरलो: वाटेर जीव होगडायलो
फोंडें, प्रतिनिधी: कुर्टीच्या उड्डाण पुलार वेगान धांवपी केटीएम हे दुचाकीचो धपको डिवायडराक बसून जाल्ल्या अपघातांत श्रावण हरी नायक (१९, कुंडय) हाका जाग्यारूच मरण आयलें. दोन दिसां पयलीं इश्टान घेतिल्ली पोरणी केटीएम घेवन श्रावण उसगांवच्यान कुंडय वतालो. तेन्ना ताका हो अपघात जालो. फोंडें पुलिसांनी अपघाताचो पंचनामो केला.
पुलिसां कडल्यान मेळिल्ले म्हायती प्रमाण, जीए – ०७- एम – ३२९९ क्रमांकाची ही दुचाकी श्रावण हाच्या इश्टान दोन दिसां पयलीं घेतिल्ली. दुचाकी चलोवपाची आवड आशिल्ल्या श्रावणान शुक्रारा सकाळीं बळयां इश्टा कडल्यान केटीएम दुचाकी घेतली. तेन्ना इश्टान ताका गाडी घेवन वचूं नाका अशी विनवणी केल्ली. मात ताणें इश्टाचें आयकनासतना केटीएम व्हेली. सकाळीं सुमार ११.३० वरांचेर उड्डाण पुला वयल्यान वतना दुचाकी वयलें नियंत्रण गेल्ल्यान केटीएमचो डिवायडराक धपको बसलो. तकली लायटीच्या खांब्याक आदळिल्ल्यान ताका जाग्यारूच मरण आयलें. फोंडें पुलीस स्टेशनाचे निरीक्षक तुषार लोटलीकार हांच्या मार्गदर्शना खाला पंचनामो केलो.
अपघाताची म्हायती मेळटांच श्रावणाच्या कुटुंबियांनी आनी इश्टांनी उपजिल्हो हॉस्पिटलांत गर्दी केली. श्रावणान हॅल्मेट घालूंक नाशिल्ल्यान ताचे तकलेक गंभीर जखम जाल्ली.
मापा- पंचवाडी उदकाचो टँकर आनी खडी व्हरपी ट्रका मदीं अपघात: एकल्याक मरण
मापा- पंचवाडी शुक्रारा दनपरां उदकाच्या टँकर आनी खडी व्हरपी ट्रका मदीं अपघात जावन टँकराचो धपको एके गाडयेक बसून तो रस्त्यार उमथो पडलो. हातूंत टँकरांत आशिल्ल्या महंमद हाका जाग्यारूच मरण आयलें. टँकर उमथो पडिल्ल्यान सुमार ३ वरां फोंडा- सावर्डें म्हामार्गाचेर येरादारी ठप्प जाली. अपघाता उपरांत कुडचडें आनी फोंडें पुलीस घडणुके सुवातेर पावले.
मेळिल्ले म्हायती प्रमाण, जीए- ०१- झेड – १३०५ क्रमांकाची टँकर सावड्डेंच्यान पंचवाडी वतालो. मापा अरुंद रस्त्यार विरुद्ध दिशेन वचपी जीए – ०९- यु – ३६४६ क्रमांकाच्या खडी व्हरपी ट्रकाक टँकराचो धपको बसलो. ट्रकाक धपको बशिल्ल्यान टँकर चालकाचें नियंत्रण गेलें आनी तांणी विरुद्ध दिकेन येवपी जीए -११- टी – ४५८३ क्रमांकाचे गाडयेक धपको दिलो. गाडयेक धपको दिना फुडें टँकर रस्त्यार उमथलो. हातूंत महंमद हाका जाग्यारूच मरण आयलें. जाल्यार गाडयेंतले तीग जाण जखमी जाले. जखमींक कुडचडें भलायकी केंद्रांत दाखल केले.
अपघाता उपरांत सुमार ३ वरां सावड्डें ते फोंडें मार्गा वयली येरादारी ठप्प जाल्ली. तशेंच प्रवासी बसीय आडकून उरल्यो. ताका लागून खुबशे प्रवासी मापा ते सावर्डे मेरेन चलत गेले. अपघाता उपरांत कुडचडें आनी फोंडें पुलीस थंय पावले. फोंडें पुलीस निरीक्षक तुषार लोटलीकार हांच्या मार्गदर्शना खाला पंचनामो केलो. क्रेनचे मजतीन टँकराक कुशीक काडले उपरांत येरादारी सुरळीत जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
