भांगरभूंय | प्रतिनिधी
भांगरभूंय । प्रतिनिधी
माशेलः गोंय राज्य पायाभूत उदरगत म्हामंडळान (जीएसआयडीसी) तीन कोटी रुपये खर्च करून बांदल्ल्या कुमाजुवें हांगच्या कृशी सेतूचें मुख्यमंत्री डॉ प्रमोद सावंत हाचे हस्तुकी शेनवारा उक्तावण केलें. 50 मीटर लांबायेच्या ह्या पुलाचो उपेग कुमारजुंवे आनी आशी-कुशीच्या वाठारांतल्या शेतकारांक शेतांनी ट्रक्टर व्हरपाक उपेग जातलो. भाजपा सरकाराचे राजवटींत केंद्र तशेंच गोंय सरकारान शेतकारांच्या कल्याणाच्यो जायतो येवजणे चालीक लायल्यान अशें मुख्यमंत्र्यान ह्या वेळार सांगलें.
पूल उक्तावण कार्यावळीक कुमारजुवेंचो आमदार राजेश फळदेसाय, कुमारजुवेंचो सरपंच नंदकुमार शेट, पंच वांगडी सुरेंद्र नायक, लक्ष्मण रायकार, नीलेश शिरोडकार, महेश देसाय आनी शेतकार हाजीर आशिल्ले. देशांतल्या शेतकाराचें प्रश्न सुटावे करपा खातीर पंतप्रधान नरेंद्र मोदी हाणी चलयल्ल्या यत्नाची व्हो पूल म्हणल्यार एक देख आसा अशें मुख्यमंत्र्यान सांगलें.
गोयांत अटल सेतू, ज्ञानसेतू, योग सेतू आनी आतां कृशी सेतू अशे चार सेतू आसात. शेतकारांनी तीन कोटी रुपया मोलाचें कृशी उत्पन्न घरा हाडले जाल्यारूच ह्या पुला खातीर केल्लो खर्च भरून येतलो. शेतकारांनी त्या खातीर वेगवेगळी पिका घेवपाक सुरवात करपाक जाय. पुलाच्या सैमीक वाठारांत प्री व्हेडींग तशेंच सैम फोटोग्राफीक वाव मेळटलो. खारफुटी आनी पर्यावरणा कडेन पर्यटक आकर्शीत जावपाक शकतात अशें ताणे सांगलें.
पंतप्रधान नरेंद्र मोदी हाच्या फुडारपणा खाला आमचो देश आत्मनिर्भर आनी स्वयंपूर्ण जावपाक लागला. तरणाट्यांनी कृशी, नुस्त्ये. दूद, फळां उत्पादन घेवपाच्या कामाक लागपाक जाय. कुमारजुवें मतदारसंघात कृशी म्हाविद्यालय उबारतात. गोंयांत पशुवैजकी आनी मत्स्य म्हाविद्यालय स्थापन करपाचो विचार आसा अशी म्हायती डॉ सावंत हाणे दिली आनी गोंय स्वयंपूर्ण करपाच्या कामाक सरकाराक सहकार्य करपाचें आवाहन केलें.
कुमारजुवें कृशी सेतूचो लाब पुलाच्या तीन लाख चौखण मीटर वाठारांत आशिल्ल्या 62 शेतकारांक जातलो अशें आमदार राजेश फळदेसायान सांगलें. जायती शेतां सध्या पडंग दवोरल्यांत. पुलाक लागून ते कसपाच्या कामाक शेतकार लागतले असो विस्वास ताणे उक्तायलो. कृशी उत्पादनां बाबतींत राज्याक आत्मनिर्भर करपा खातीर तरणाट्यंनी कृशी वेवसायांत पावलां घालपाक जाय. सरकारा कडल्यान तांका जाय ती मजत मेळटली अशेंय ताणे सांगलें. कृशी सेतूचेर सोलर पॅनल बसयल्यान. लायट नासल्यार रातयां ताचेर दिवे पेटल्ले. पूल बांदपाची शेतकार आनी लोकांची जायत्या वर्सांची मागणी पुराय जाल्या अशें नंदकुमार शेट हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
