भांगरभूंय | प्रतिनिधी
दिवचल, प्रतिनिधी : कुडचिरें, बाराजण हांगा सरकारान सुमार ४५ हजार चौरस मिटर जमनीचेर बांदकाम कोयर विलो प्रक्रिया प्रकल्प उबारपाचें थारायलां. ताका आयज आयतारा ग्रामस्थांनी खर विरोध केलो. ह्या वेळार गांवच्या सगळ्या लोकांनी गर्दी केल्ली.
ह्या प्रकल्पाक लागून गांवचे पर्यावरण, उदकास्रोत, न्हंयो, व्हाळांचो विध्वंस जातलो. ताका लागून खंयचेच परिस्थितींत आमकां हो प्रकल्प नाका. अशे तरेची भुमिका घेत ग्रामस्थांनी ह्या प्रकल्पाक एकमतान विरोध केलो. तांणी हाचे आदींय ताका विरोध केल्लो.
प्रसाद उमर्यें हांणी सांगलें, ग्रामस्थांनी आतां एकवटान रावप गरजेचें. कसलेच तरेच्या चेंपणाक बळी पडनासतना खंयचेय परिस्थितींत एकवट कायम दवरप गरजेचें. हार मानिनासतना सगळे तरेची लढाय लढपाक सज्ज रावपाचो उलो तांणी मारलो.
ह्या वेळार बायला, तरणाटे, जेश्ठ नागरिकांनी गर्दी केल्ली. ह्या वेळार ग्रामस्थांनी गांवची राखण करची, तशेंच कसलेच तरेचे प्रकल्प जावचे न्हय, गांवचो एकवट सगळ्यांनी राखचो म्हणून देवांक गाराणें घालें.
सरपंच आनी पंचायत मंडळान हे विशीं कसली कारवाय केली, असो प्रस्न नागरिकांनी विचारलो. तेन्ना पंचायत वांगडी हजर नाशिल्ले. पंचायतीन हे विशीं बेगोबेग कारवाय करप अपेक्षीत आशिल्ल्याचें लोकांनी स्पश्ट केलें.
नांव तकटे घेवन, प्रकल्पाक विरोध करपी घोशणा दीत ग्रामस्थांनी मैदान ते सांतेरी देवळा मेरेन मिरवणूक काडली. ह्या वेळार मनोहर गांवकार, सावळो गांवकार, शिवनाथ गांवकार आनी हेरांनी प्रकल्पाक खर विरोध केलो.
आमी कुडचिरेंचे ग्रामस्थ खंयच्याच पक्षाच्या आड ना. आमचो लढो गांवचें हित राखपा कडेन आसा. सगळ्यांनी एकठांय येवप, एकवट राखून दवरप होच आमचो हेतू. फुडाराक प्रकल्पा खातीर हालचाली वाडल्यार खर आंदोलन करपाचो निर्धार लोकांनी उक्तायलो.
ऑगस्टाच्या निमाण्या सप्तकांत बाराजण कुडचिरें हांगा ह्या प्रकल्पा विशीं सर्व्हे केल्लो तो पुरायेन पुलीस बंदोबस्तांत केलो. तेन्ना गांवकर्यांनी ताका खर विरोध केल्लो. उपरांत विशेश ग्रामसभा घेतिल्ली. तेन्ना प्रकरण बरेंच तापिल्लें.
आमच्या गांवांत बाराजण थळ आसा ताका दैवी म्हत्व आसा. हांगा अशे तरेचो प्रकल्प करप चुकीचें. तशेंच पर्यावरण आनी गांवच्या अस्तित्वाक धोको निर्माण जावंक शकता. ताका लागून आमकां खंयचेच परिस्थितींत हो प्रकल्प हांगा नाका, अशे तरेचे विचार ह्या वेळार ग्रामसभेंत लोकांनी उक्तायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
